Nanortallip immikkut kommuninngornissaanut atsiortitseqataasut ilai innuttaasunik ataatsimiisitsinermi peqataapput. Kommunalbestyrelsip Nanortallip immikkut kommuninngorsinnaaneranut tunngatillugu aningaasaqarnikkut kinguneqaatissanik misissueqqissaartoqarnissaanik aalajangeranut atatillugu sooq, qanoq, qaqugukkullu missueqqissaartoqassaneranik apeqqutilliisoqarpoq.
-Nanortallip immikkut kommuninngornissaanik isumasiuiffiusumik taasisitsineq Nanortalimmi innutaasut siunissaannut annertuumik kingunerlutitsisinnaavoq." Taamaattumik innuttaasut, kommunalbestyrelsi kiisalu nuna tamakkerlugu qinikkat kommunip
aaqqissugaaneranik inaarutaasumik aalajangiisussaasut, anigaasaqarneq pillugu paasissutissiinissaminnut pisussaaffeqarput, kommunit nutaat avinneqassappata tamanna tunngavigineqartussaammat. Isumasiuiffiusumik taasisitsipallanneq isumanni illersorneqarsinnaanngilaq, tamaammat misissueqqissaartoqassaaq misissuinerlu naammassiguni innuttaasunut saqqummiunneqassaaq, borgmester Stine Egede oqarpoq.
Kommuninik agguataarinissaq taamaallaat innuttaasunit eqqartorneqanngilaq. Innuttaasoq Nanortallip najugaqarfiginissaanut pilerinarsarsaasoqartariaqartoq oqaatigaa, aammattaaq kuluturikkut uummarsaasoqartariaqarlunilu pitsaassullu ukkanneqartariaqartut ilanngullugit oqaatigai, soorlu Narnortalimmi ilinniarfissanik amerlanerusunik ujartuisoqartoq.
Hashimik akiuiniarnissamut ilanngaaserisussaaleqineq, saarullinnaanngitsunik aalisakkanik allanik tunisassiornissamik periarfissaq, aqqusinerninik asfalterineq ilaatigut innuttaasunit eqqartorneqarput. Borgmesterip sapaatip akunnerani Nanortalimmiinera taamatuttaaq ataatsimiinnerpassuarnik pilersaaruteqarfiuvoq, ilaatigut kommunimi sulisut, suliffeqarfiit kiisalu peqatigiiffiit ataatsimeeqatigai. Atuarfik 180-nik atuartulik, atuartunik 35-nik specialklasseni arfineq-pingasuusuni immikkut atuartinneqartartunik atuartuuteqarpoq.
-Nanortalimmi meeqqat tallimaagaangata ataaseq immikkut atuartinneqartarpoq. Ilinniartitsisut ajornartorsiutit pillugut suleqatiigiittarnerat tusarlugu tulluussimaarutigaara. Annertuumik sumiginnaaneq meeqqat amerlasuut ingerlalluannginnerannut ajornartorisuteqarnerannullu peqqutaasartoq ilisimavarput. Pitsaanerusumik ineriartortitsinissamut suliniutissaq assut annertuvoq, kinguaariinniillu aaqqinneqartariaqarluni, aammattaaq Nanortalimmi ilinniarsimasunik amerlanerusunik aalajaatsunillu sulisoqarnissaq pisariaqartinneqarpoq, tamanna aamma utoqqarnut tunngasunik suliassaqarfimmi atuuppoq, Stine Egede oqarpoq.
Stine Egede ima naggasiivoq: ”Sapaatip akunnerata ingerlanerani inuusuttut utoqqaallu timersortartut GM-imilu saqqarmiortaarsimasut naapippakka. Suliffeqarfiutillit siunissamut ajunngitsumik neriuuteqarluartut naapippakka. Timersortarfik ingerlalluarpoq, illoqarfimmi aserorterisarneq siornatigorniit annikinneruvoq, kommunimilu sulisut tunniusimasut naapippakka. Sapaatip akunnera pissarsiffiulluartuuvoq aammattaaq inuit piumassuseqarluartut isumalluuteqarluartullu Nanortalimmi pitsaasumik inuuneqartoqarnissaanik tamarmik suliniuteqartuusut naapippakka".