Eqqumiitsuliarujussuit Nanortalimmi kusassaataasut

“Takornariat umiarsuarni takornariartaatineersut tikikkaangata eqqumiitsulioqataaffigisimasakka takugaangatigit tulluusimaartarpunga."
Linda – Marie Eliassenip 16-inik ukiullip inuunermini periarfissanik nutaaqartoq takusinnaavaa.

“Siullermik suleqatigiinnissamut ornigunnissannut sapiukkaluarpunga, kisianni massakkut nuannaarpunga saperunnaarlunga peqataaniarsimagama. Qalipaasut qarliinik atisigama immikkut misigisaqarfigaara, nuannaartunartutullu misigalunga. Soraaleratta peerusunngikkaluarpakka", qungujulluni oqarpoq.

Linda inuusuttut qulit allat Nanortalimmeersut peqatigalugit illoqarfimmut annertuumik allannguutaasumik suliaqarput.
Takornariat taamaallaat illoqarfik qalipagalik nuannaarutiginngilaat.

“Tamatta illoqarfitta illui paarinerulerpagut. Tassanngaanniit illut angerlarsimaffiinnaajunnaarlutik suliffeqarfiinnaajunnaarlutillu isigiuminartunngorput". Thora Andreassen Nanortalimmi inunngorlunilu perorsimasoq, siornatigullu inuusuttunik siunnersuusimasoq oqarpoq.

Kujataani ingerlaarfiit eqqumiitsuliartallit ilaqqipput:

Nanortalimmi eqqumiitsuliat nutaat arfineq-marluk 7,5 m x 4,5 meterisut angissuseqarput. Taakku sananeqarput Sanasamut attuumassuteqarlutik. Suliniut 2018-imi aallarnerpoq. Inuusuttullu sanalluarsimaqaat.
Tamanna sumiiffinni eqqumiitsuliortut inuussutissarsiortullu suleqatigalugit ingerlanneqarpoq.

Streetart (aqqusinerni eqqumiitsuliat) angisuut nutaat ima ateqarput:
2020 Maaniinnikuuvunga
2021 Nanortalik Nuan
2022 Imaqaq
2023 Johanne
2023 Angakkoq Kingilleq
2023 Neriuut Nukittooq
2023 Asanninneq Nukiuvoq
Aqqit tamarmik kujataani pinngortitamut oqaluttuatoqqanullu toqqaannartumik attuumassuteqarput.

Nanortalimmi suliat naammassineqarnerini kujataani eqqumiitsulianik imalimmik ingerlaarfeqalernera tunniunneqarsinnaalerpoq.
Qaqortumi, Narsami Nanortalimmilu Sanasa maanna eqqumiitsuliat 17-iusut pilersissimalerpai.

Qaqortumi: Arferup Pania, Inuussut, Aataakulooq, Torben Torsk, suliat tallimat.
Narsami: Igdlo Tungujortoq, Illaarneq, Immini Silarsuaani, Maaniippunga, Andakulooq, suliat tallimat.
Nanortalimmi: Maaniinnikuuvunga, Nanortalik Nuan, Imaqaq, Angakkoq Kingilleq, Neriuut, Asanninneq Nukiuvoq, suliat arfineq-marluk.
Qaqortumi Ujarak Inullu (Sten og menneske) ilisarisimalluarneqarpoq, tamanna aamma eqqumiitsuliortut inuusuttullu peqatigalugit suliaavoq.

Inuusuttut
Inuusuttut 15-it 35-llu akornanni ukiullit 200-t sinnerlugit suleqatigiissitamut Sanasamut peqataasimapput. Peqataanermi takuneqarsinnaasimavoq inuusuttut piginnaaneqarsimasut siornatigut atorluarsimanngisaminnik atorluaasut. Nassaarsiorsinnaassuseq atorluarsimanngisaq atorluarneqalerluni. Inuusuttut imminnut kajumissaarsimapput peqataanissaminnut, imminnut sunniivigisimapput
Imminnut isumassarsiorfigalutik - inuusuttut imminnut sianerfigisaattarsimapput, taamaasillutik aalaakkaasumik orniguttarlutik.


Suleqatigiit tassaapput
Suliniutit SANASA Kommune Kujalliup Oak Foundation Denmarkillu 2018-imili tapersersulerpai, suliniummi inuusuttut 15-iniit 35-t tikillugit ukiullit peqatigalugit illoqarfinni kusanartunik pilersitsinissaq siunertaavoq.
Assassornermi aamma siunertaavoq inuusuttut inuussutissarsiornissaminni atorluarsinnaasaminnik periarfissaqarnertik takutissallugu. Taamaammat SANASA Qaqortumi, Narsami Nanortalimmilu Majoriat qanimut suleqatigai.

Takornarianut allanullu Sanasap kujataani illoqarfinni pingasuusuni takusassiai pillugit kalaallisut, qallunaatut tuluttullu atuagassiortoqaleruttorpoq.