FN-ip nunarsuaq tamakkerlugu piujuaannartitsinissamut ineriartortitsinissamullu suliniutai sammisaqarnermi ingerlanneqarput. 4.a-ni atuartut normu 4 tassaasoq Ilinniartitaaneq Pitsaasusilik sammivaat, taakku Kommune Kujallermi borgmesteri aggersarpaat, atuarfimminni taquanik tunisittarsinnaanerminnik kissaateqarlutik.
- Nuannaaqaanga atuarfimmut aggersarneqarama, suliniutitsinni ilaavoq atuarfiit tamarmik nillataartitsiveqalernissaat, taannalu atuarfiit ilaani piviusunngoreerpoq. Atuartulli apuussaat isumaqaqaat, isumaqarpunga eqqartugassaqqissuusut, Kommune Kujallermi Borgemesteri Stine Egede oqarpoq.
4.a-t eqimattanut sisamanut agguarneqarnerminni sammisaat tassaapput: Eqimattat 1, Anitsiartarfimmi issakatsiaartarfimmik arsaanermilu måleeqqanik sananeq. Eqimattat 2, Biilit assakaasukuinik anitsiartarfimmi pinnguartarfiliorneq aammalu aalisariarsinnaannissaminnik qinnuteqarlutik allagarqarput. Eqimattat 3, Torsuusami pinnguaataasinnaasunik pilersitsineq atuarfimmilu pisiniarfeeraqalernissaannik allagaqarneq. Eqimattat 4, Torsuusami tabelinik kisitsisitalinnik qalipaaneq aamma atuarfimmi taqussanik tunisittalernissaq kissaatigalugu borgmesterimut allagaqarneq.
Tasersuup Atuarfiani akullerni atuartut ilai, suliffeqarfiit ilinniaqqiffissallu pilerigisat suliffigerusutallu aallaavigalugit sammisaqarput. Nukarliilu ilai Qaqortumi mittarfeqalerpat suut periarfissat ammassanersut aamma ilaatigut sammisimavaat.