Pingaartumik nunaqarfinni eqqagassalerineq eqqakkanillu immikkoortiterinissamut periarfissat sammineqartarput. Nunaqarfinni qassiini illut ullutsinnut naleqquttut kissaatigineqarput kiisalu illut inoqanngitsut pisiarerusunneqartarput imaluunniit ingutsernissaat kissaatigineqartarluni, kiisalu illut ullumikkornit pilertornerusumik tuniniarneqartalernissaat apeqqutigineqarpoq.
Stine Egede oqarpoq: "Kommunip illuutaanik atorneqanngitsunik amerlanerusunik tuniniaaniarluta piareersalereeratta tamanna nangissavarput. Innuttaasullu illuserusunnerat qujanarpoq illut inoqanngiinnaratik atorneqalerniassammata. Eqqaamasariaqarporli illut arlalissuit inoqanngimmata aserfallassimammatalu piginnittuisa eqqortumik nalunaarsorneqarsimannginnerannik pissuteqartumik. Taamaammat pisinermut uppernarsaasiortarnissaq kiisalu eqqartuussivinni piginnittuunermut uppernarsaateqartitsisarnissaq pingaaruteqarput. Tamanna pillugu nunatsinni qaammarsaanermut pikkorinnerulertariaqarpugut.”
Aalisartut piniartullu saqqummiutillattaartuagaat tassaavoq pisortanut akiitsoqarlutik kommunip suliffiutaanut tunisisinnaasannginnertik.
"Aalisartut piniartullu pisortat suliffiutaannut tunisisinnaaleqikkumallutik pisortanut akiitsuminnik akilersuilernissamik isumaqatigiissusiorsimanerat tusarlugu nuanneqaaq. Ataaseq oqaluttuarpoq maanna akiitsuerussimagami aatsaat taama tunisaqartigisalersimalluni”, Stine Egede oqarpoq.
Suliffissarsiuussisarfinni periarfissat nunaqarfinni saqquminerulernissaat nunaqarfiit ilaanni tikkuarneqarpoq. Nunaqarfiit pilersaarusiorfigineqarnerisa nutartertariaqarnerat nunaqarfinni qassiinissaaq saqqummiunneqartarpoq, aammalu ungaloqannginnera pillugu savat nunaqarfinni angalaaginnarnerat aaqqinneqartariaqartoq oqaatigineqarpoq.
Stine Egede oqarpoq: ”Kommunitsinni sanaartugassatut kissaatit amerlaqaat. Kommunitsinni missingersuutit qaffasinnerpaaffeqalersimanerat sanaartugassanillu pisariaqartitsisoqarnera ataatsimiinnerni oqaatigisarpakka, aamma sanaartugassatut pisariaqartitatsinnik pilersaarusiortariaqarnerput tulleriiaarisariaqarnerpullu ilanngullugu oqaatigisarlugu. Puttasuugaluarpata, inissiat amerlanerugaluarpata kiisalu inuiaqatigiit aningaasarsiornerannik qaffassaasussamik inuussutissarsiornikkut attaveqaateqarnikkullu pitsanngorsaataagaluarpata aningaasassaqartinnissaat qularnaartariaqarparput, assersuutigalugu taarsigassarsinikkut”.
Isumaginninneq pillugu innuttaasunik oqaloqatiginnittarnerit tunngavigalugit isumaginninnermut ataatsimiititaliamut ilaasortat isumaqatigiipput, angerlarsimaffimmi ikiorteqartitsinermut aaqqissuussinerit massakkut atuuttut allannguuteqartinnissaat misissorumallugu angerlarsimaffimmi ikiortit suliinnarsinnaanerat qularnaarniarlugu, kiisalu pinaveersaartitsinermi nammineq kajumissutsimik sulinermut politikki suliarineqartariaqartoq.
Sunngiffik eqqarsaatigalugu nunaqarfinni meeqqat inuusuttuaqqallu sunngiffimmi sammisaqartinneqarnerannik pitsanngorsaanissaq ataatsimiititaliap ilaasortaanit eqqartorneqarpoq.
Borgmester Stine Egedep aallarniutigalugu kommunip aningaasaqarnera naatsumik killiffissiortarpaa kingornalu innuttaasut ataatsimiititalianik sisamaasunik ingerlatsivimmilu pisortanik naapitsinissamut periarfissinneqartarput, tassa Inerisaanermut ataatsimiititaliaq (atuarfeqarneq meeqqeriveqarneq, suliffeqarneq, kultur sunngiffillu), Teknikknikkimut Avatangiisinullu Ataatsimiititaliaq, Isumaginninnermut pinaveersaartitsinermullu ataatsimiititaliaq kiisalu Aningaasaqarnermut inuussutissarsiornermullu ataatsimiititaliaq. Angalanermissaaq peqataapput Kommunip inuussutissarsiutinik ineriartortitsivianeersut, tassa Innovation South Greenland, ISG-imeersut.
Kommunalbestyrelsimut ilaasortat amerlanerit angalanermut tamarmut, ilaanulluunnit, peqataapput.