Ulluni arfineq marlunni meeqqat inuusuttuaqqallu 31-it sammisassaqartinneqarput, tassani uummasut nunatsinneersut ilinniarneqarput. uummasut immameersut, nunameersut timmissallu qalipallugit atuarfiup torsuusaasa ilaa iigaq qalipappaat.
Sammisaqartitsineq taaneqarpoq ”Aalisarneq – Piniarneq – Uummasut Nunatsinneersut”.
Kommune Kujalleq aasaanerani meeqqanut inuusuttuaqqanullu juuli naallugu Nanortalimmi, Narsami Qaqortumilu suliniummik ingerlatsivoq. Tasersuup Atuarfiani eqqumiitsulianik qalipaanermi ilinniartitsisuupput Erik Kielsen, taannalu ulluinnarni aalisartunik piniartunillu qanimut suleqateqartuuvoq. Ilinniartitsisup aappaa tassaavoq Heidi Zilmer, ukiorpassuarni Sanasa Streetart eqqumiitsuliorneq aqqutigalugu kujataani workshopeqartitsisarnikkut suliaqartarsimasoq.
Meeqqat inuusuttuaqqallu tallimaniit 20-it tikillugit ukiullit assigiinngitsunik qalipaanikkut titartaanikkullu piginnaasaqarlutillu misilittagaqarput, tamarmilli workshoppimi peqataanertik ilinniarfigalugulu nuannaraat.
- Meeqqat inuusuttuaqallu workshoppertitsinermi avammut nittarsaatitsisuulluarnerpaapput. Kammalaatitik suliaminnik oqaluttuarfigisarpaat, taamaasilluni ullut tamaasa meeqqanik inuusuttuaqqanillu kammalaatiminnik nutaanik peqataasoqartitsisarlutik. Peqataanertik tulluussimaarutigalugulu nuannaarutigaat, eqqumiitsulianillu kusanartumik pilersitsillutik. Aalisartut piniartullu pillugit kulturitsinnik ilisimasaqarnerulerput. Meeqqat inuusuttuaqqallu kulturitta oqaluttuassartaannik ilinniarnissaat pingaaruteqaqaaq, Sammisaqarnermi ilinniartitsisoq Erik Kielsen oqarpoq.
Projekti Kommune Kujallermiit Innovation Southgreenlandimiillu aningaasatigut tapersersorneqarpoq.
Uummasut nunatsinneersut pillugit workshopeqartitsineq iluatsilluartoq
Qaqortumi Tasersuup Atuarfiani meeqqanut inuusuttunullu eqqumiitsulianik qalipaanermik sammisaqartitsineq peqataaffigilluarneqarpoq.
Udgivet d. 21. juli 2023