Meeqqat ulluanni meeqqanut angajoqqaanullu naatsunnguamik oqariartuuteqassalluni tulluarsorivara.
Meeqqanut
Meeqqat ilissi ullumi pilluaqqusarpatsigit pissutaalluni meeqqat ulluanni immikkut ittumik meeqqat pisinnaatitaaffigisasi isummassi oqarsinnaatitaanersilu ataqqineqarnissaat tamatta inuiaqatigiittut malugitinniaratsigit. Sumiluunniit ajornartorsiorussi eqqaamasiuk saaffissaqartuaannarpoq. Qanortoq ulloq nuannersumik qiimasumillu atorluarumaarissi neriuutigaara.
Angajoqqanut
Angajoqqaanut oqarusuppunga: Meeqqat tamarmik toqqissisimanartumik peroriartornissaat inersimasut tamatta akisussaaffigaarput. Angerlarsimaffik toqqissisimasoq, meeqqat pisariaqartitaannik, atisaappata, nerisassaappata, qasuerlutik sinissimallutik meeqqerivinnukaanneqarnissaat atuariartarnissaalluunniit, minnerunngitsumillu peqqissumik inuuneqarnissamut aqqutissiuunneqarnissaat, tassa inersimasut tamatta akisussaaffipput.
Inersimasut tamatta inatsisitigut pisussaaffeqarpugut inoqatitsinnik ikiortarialinnik naammattuugaqarutta qisuariassalluta.
Asanartut meerannguit tamassi ullumi ulloq nuannerluaqqullugu, oqaaseq nuannaarneq tamatta eqqaamallugu, nuannaarluarnissassinnik kissaappassi.
Angajoqqaat, ningiukkut, ittukkut, allallu qanigisaasuni najuuttusi taama oqaaseqarlunga – meeqqat ulluanni meerannguit pilluaqqoqqippassi, neriuppunga ulloq manna ullorsioqatigiillusi nuannisarfigilluarumaarissi.
Stine Egede, Kommune Kujallermi borgmesteri
Meeqqat ulluanni borgmesterip Stine Egedep meeqqanut pilluaqqussutaa
Asasakka meeqqat, ullumi meeqqat ullorsiornissinni pilluangaaritsi.
Udgivet d. 01. juni 2023