Politikkikkut suleqatigiit ammasuunissamik siunertarisaannut ilanngullugu upernaat ukiallu tamaasa borgmester Stine Egede illoqarfinni pingasuni innuttaasunik ataatsimiititsisarpoq. Ukiup affaani siullermi innuttaasunik ataatsimiititsisarnerni 2024-mi akileraarutit appartinneqartussanngornerat immikkut sammineqartarpoq, kommunillu aningaasaqarnera kiisalu kommunimi inuussutissarsiornikkut periarfissat innuttaasunit amerlasuunit paasisaqarfigerusunneqartarlutik.
Nanortalimmilu innuttaasunik ataatsimiititsinermi Nanortalimmi aatsitassarsiornermut ilinniarfeqalernissaa ilaatigut siunnersuutigineqarpoq.
Aatsitassarsiornikkut pisut amerliartornerat, pingaartumik Ingerlatseqatigiiffik naapertorlugu massakkut aatsitassarsiorfiup Nalunap ammaqqinneqartussanngornera, ukiunilu aggersuni 100-inik sulisoqalernissaminik ilimasunnera, kiisalu Amitsumi aqerluusarsiorfiup ulapaarfiulernera pissutigalugit Kommune Kujallermi ukiuni aggersuni aningaasarsiornikkut ineriartortoqalernissaanik neriulersitsisimavoq.
Borgmesteri Stine Egede ima oqarpoq: ”Aatsitassarsiornikkut siuariartortoqarpoq inuussutissarsiornermilu sulisorineqartussat nunaqavissuunissaat inuiaqatigiit ineriartornerannut assorsuaq pingaaruteqarpoq. Kikkut attuumassuteqartut tamaasa peqatigalugit inuussutissarsiutini siuariartorfiusuni inuusuttut ilinniagaqalernissaannut suliffeqalernissaannullu aaqqiissutissanik nassaarniarluta nukivut tamaasa atortariaqarpavut.
Innuttaasunik ataatsimiititsinermi ilaatigut inissiat amerlanerusut pitsaanerusullu pisariaqartinneqarnerat, puigortunngortunut immikkoortamik pisariaqartitsineq, sunngiffimmi sammisassanik kiisalu illoqarfinni nunaqarfinnilu tamani meeqqanik inuusuttunillu peqataatitsineq, kulturikkut neqeroorutinik ineriartortitsinermi annerusumik suleqatigiittariaqarneq, illoqarfinnik ineriartortitsineq, pinaveersaartitsineq annerusut pisariaqartullu allat saqqummiunneqarput.
"Kommunimut qinersinermit ukiut marluk ingerlareerneranni suliassat aallartitavut naammassisavullu innuttaasunik ataatsimiititsinermi saqqummiuttarpakka. Uanga nammineq isumaga naapertorlugu angusaqangaatsiarsimaqaagut, saqqummiussassamalu nuannersut ilagaat ukiut qasseerpassuit ingerlaneranni aatsaat taama ilinniartitsisunik amerlatigisunik atorfinitsitsisinnaagatta. Tamanna nuannersuuvoq, neriuppungalu ukiuni aggersuni isumaginnittoqarfik tullinnguusinnaassagipput” borgmester Stine Egede oqarpoq.
28. juni Nanortalimmi innuttaasunik ataatsimiititsinermi borgmesteri ilisimatinneqarpoq kommunimit aninissamik innuttaasut ilaat sulissuteqalersimasoq, tassanilu tunngavilersuutaasoq tassaasoq aatsitassarsiornerup annertusisussaanera pissutigalugu Nanortallup ineriartornissaanut annerusumik periarfissaqalertussaanera.
Innuttaasunik ataatsimiititsinermissaaq kommunip ilisarnaataata nutarterneqarnera borgmesterip oqaluttuarisarpaa. Nanortalimi 28. juni 2023 innuttaasunik ataatsimiititsineq ukiup affaani siullermi innuttaasunik ataatsimiititsisaqattaartarnerit kingullersaraat. Sikorsuit pissutigalugit aningaasaqarnermut ataatsimiititaliap kiisalu teknikkimut ataatsimiititaliap nunaqarfinnut angalanissaralui kingusinnerusumut kinguartinneqarput.