Ataatsimiinnermi ataatsimiititaliaq Naalakkersuisut pimmatilliisarnermut akiuiniarnermi periusissiaannik kiisalu ilisimatusarnikkut pimmatilliisarneq pillugu paasisanik nutaanik saqqummiivigineqarpoq. Ataatsimiinnermissaaq meeqqat inuusuttuaqqallu ataatsimooqatigiiffiini pimmatilliisarnermut akiuiniarluni millisaaniarlunilu kommune qanoq ingerlariaqqissinnaanersoq sammineqarpoq.
Pimmatilliisarneq pillugu ilisimatusarnermit oqaatigineqartoq pingaartoq tassaavoq pimmatilliineq ataatsimooqatigiiffinni peqatigiilluarfiunngitsuni ajattuinermik pilersitsisarmat. Oqariartuutillu ilaat tassavoq inunnik sullissiviit suliassaat tassaasoq peqqissumik ataatsimooqatigiiffiit pilersissallugit, kiisalu ataatsimooqatigiiffinni atugarissaarnissaq ullut tamaasa aalluttassallugu kiisalu immikkuulersitsinerlu pinngitsoorniassallugu.
Pimmatilliisarnerup akiorneqarnerani periusissami kaammattuutigineqarpoq sulisut pikkorissartarnermikkut ilisimasaqarnerulissasut, Kammagiittami sammisaqartitsinerit meeqqani kulturiannut avatangiisaannullu naleqquttuussasut, atuartitsinermi atuarfimmut atasutut misigineq nukittorsarneqassasoq ataatsimooqatigiinnerlu pitsanngorsarneqassasoq kiisalu akuersaarneq, ataqqeqatigiinneq paaseqatigiinnerlu anguniarlugu angajoqqaat sulinerat nukittorsarneqassasoq.
Politikkikkut ataatsimiititaliaq aalajangerpoq meeqqat inuusuttuaqqallu atugaat pitsanngorsarniarlugit kiisalu pimmatilliisarneq akiorniarlugu annikillisarniarlugulu sutigut tamatigut nutaanik iliortoqassasoq.
Ataatsimiititaliap siulittaasua Bibi Kielsen oqarpoq: ”Aalajangerpugut paaqqinnittarfinni atuarfinnilu kommune pimmatiginninnerup akiorneqarneranut ataatsimut periuseqalissasoq, nuannaarpungalu maanna sulinitta aallartinnissaanut ilisimasanik isumassarsianillu peqaleratta”.
Pimmatilliinermut akiuiniaaqatigiinnik sapaatit akunnerat taanna ataatsimeeqateqartarnerup kingorna kommunimi meeqqeriviit atuarfiillu pisortaat aalajangerput politikkikkut sulinerup saniatigut pimmatilliisarneq akiorniarlugu perorsaanikkut ineriartortitsineq malunnaatilimmik aallunnerulerneqassasoq. Taamattaaq Inerisaanermut Ingerlatsivik soqutiginnittunik suleqateqarluni suliamut tamatumunnga tapersersuilluarnissaminik suliassaqalerpoq.