Kommune Kujallermi Isumaginninnermut Pinaveersaartitsinermullu Ingerlatsivimmi aqutsisut, aamma Isumaginninnermut Ataatsimiititaliami ilaasortat peqatigiillutik Ilaqutariinni aqqutissioqatigiinneq pillugu paasisassarsiorput suleriaqqinnissamullu isumasioqatigiillutik. Periuseq pitsaasoq susassaqartut tamaasa sungiunnissaat pisariaqartoq ingerlatsiviup pisortaata oqaatigaa.
- Periusissiaq sulisut tamatta sungiunnissaa pingaaruteqarpoq, isumaqarpungalu uani politikkerivut pingaarutilimmik aamma inissisimaqataasut. Ilaqutariinni ikiortarialinni aqqutissiornermi periuseq pitsaasoq maani atorusupparput, meerarlu qitiutillugu sulinermi ilaqutariit pinngitsoorsinnaaneq ajorpagut, Isumaginninnermut Pinaveersaartitsinermut Ingerlatsivimmi pisortaq Nielsine Petersen oqarpoq.
Isumasioqatigiinneq maajip aqqaneq-aappaanni pivoq.
Ilaqutariinni aqqutissioqatigiinneq periusaavoq, angajoqqaat meerarlu qanigisatik peqatigalugit namminneq pilersaarusiorfigisinnaasaat aamma pilersaarusiaminnik naammassillugu piviusunngortitsisinnaafiat. Taamaalilluni ilaqutariini ajornartorsiornermi meeqqat ajunnginnerpaammik ikiorniarlugit ilaqutariit meeqqamut qanigisaasut aqqutissiuinermi peqataatinneqarsinnaasarput.