Kommune Kujalleq isumaginninnermi suliniutai NunaFondenimit 90.000 koruuninik tunissutisivoq

Kommune Kujallermi meeqqanut inuusuttunullu pisariaqartitsineq annertummat siusinaartumik immikkut Isumaginninnermut Pinaveersaartitsinermullu Ingerlatsivik illoqarfinni nunaqarfinnilu iliuuseqarpoq. Pitsaaliuinerit annertusarneqarput soorlu ilaatigut illoqarfinni ornittakkanik ammatitsinerit, unnuamilu angalaartartunik pilersitsinerit aallartillutik.
Borgmesterip Stine Egedep suliniartoqarnera tulluusimaarutigaa.

- Borgmesteritut tulluusimaarutigaara Isumaginninnermi ataatimiititaliap pisariaqartitsineq aallaavigalugu suliniummik nutaamik aallartitsimmat, tamannalu avataaniit maluginiarneqarsimallunilu tapersersorneqarusummat nuannaarutigaara, Stine Egede oqarpoq.

Meeqqat inuusuttullu atugaasa ilungersunarsinnaaneri Kommune Kujallermi kisiat ajornartorsiutaanngilaq, nuna tamakkerlugu ajornartorsiutaasoq iliuuseqartoqartariaqartorlu Stine Egedep oqaatigaa.

- Meeqqanut suliat ukiuni kingullerni nuna tamakkerlugu oqimaalliartuinnavipput. Sulisussanik amigaateqarneq ajornartorsiutini annersaraat. Tamanna Naalakkersuinikkut piaartumik iliuuseqarfigisariaqarsoraara. Meeqqammi taakkuupput siunissamut isumalluutivut. Amerlanerpaat sulisinnaanngornissaat tamatta anguniartariaqarparput, aatsaammi taamaaliorutta angajoqqaanngortussat nukittuut siunissamut qularnaarsinnaavagut. Ullumikkut angajoqqaat ikiorserneqartariaqartut amerlavallaarujussuarput. Kommunitullu sulisuvut naammanngerujussuarput, assoruupput malinnaaniartuarput. Qanortoq ukiumi nutaami oqinnerusunik atugassaqartitaagilik, Kommune Kujallermi Borgmesteri Stine Egede oqarpoq.