Ullumi sapaassuarmi juullimut ullut nalliuttut aallartillugit angerlarsimaffippassuarni qaammaqqutit ukiup taarnerani qaamanermik kialaamillu tunisisut ikiterneqarsimasut makiffigaagut.
Qaamanertusiartoqqilernissatsinnut qaammataajunnaaraluartoq ulluni makkunani ataatsimoorluta ilitsoqqussarput kinguariinniit kinguaariinnut ingerlateqqinneqartuartoq taassa qaamaqqutilersornerput tamatsinnut tunissutaavoq, nukissanik tunisisoq minnerunngitsumillu meerartatsinnut juuullip tungaanut qilanaarnermik tunisisisoq.
Juullip qaammataa meerartatsinnut pigitittarpara, qularinngilaralu inersimasuusugut tamatta meeraanitsinniit juulleriartornerani juullillu ulluini misigisanik puiunaatsunik eqqaamasassaqartugut, tamanna inersimasortatta utoqqartattalu juullip tipaatsunnartuanik misigititsisarnerannik aallaaveqarpoq.
Taamaattumik tamassinnut kissaatiigerusunnarpoq meerartagut piffissaqarfigalugit juullip ullui atorumaarigut, toqqissisimanartumik avatangiiseqartinnerisigut misigisassannik nuannersunik immersoqatiginerisigut.
Eqqaamassavarpullu juulli tunissutissanik aallaaveqanngimmat, tunissutissanimmi akisuuniit ilaquttat qanigisallu ataatsimooqatigisarneri isumaqarnerungaartarmat, qamuunalu pilluarnermik immerneqaatigisaratsigit.
Ilaqutariittut ataatsimornissamut qilanaarneq amerlanerit pigaat, ilaqarpugulli asasaminnik maqaasisaqarlutik juullisiortussanik. Ilaat siullermeerlutik meeqqaminnik juullisioqateqartussaanngittut, siunissartik pillugu angerlarsimaffik qimallugu atuariarsimasut, allatulluunniit suliffik pillugu angalasariaqartut allaallumi katsorsartinneq pissutigalugu angerlarsimasinnaanngitsut tamaasa eqqaamavagut.
Nunaqqatikka qimagaasimasut, juullip tungaanut maqaasisaqarlutik uummammioqartut misiginneqatigingaarpakka, qanortoq asanninnermik nukissaqartitaallutik qanigisassinnillu najorneqarlusi juullip tipaatsunnartua misigigisiuk.
Qanoq misigigaluarutta juulli sumiluunniit ataasiusutut oqaatiginiarneqartarnera upperilluinnarpara, soorlu maanna sapaassuarmi ataatsimoorluta orpiup kusanangaartup saani katersuunnitsinni illoqarfittatsinni nunaqarfittatsinnilu aamma ataatsimoorfeqartugut.
Orpilissat illoqarfitatta Danmarkimi illoqarfittut ikinngutigisaanniit tunissutaapput, periarfissarlu manna atorlugu kommunalbestyrelsi sinnerlugu tunissuteqartunut qujarusuppunga.
Qanortoq tamatta sumiiffigisatsinni orpilissat paarilluarisigit, serlersaarfigineqannginnissaallu eqqarsaatigalugu ikioqatigiilluta paarilluaritigit.
Meerartagut paarilluarlugit juullip tungaanut ingerlaqatigiinnissarput juullimut kissaatima annersaraat; tamassi juullisiorluarnissassinnik kissaallusi sapaassuarmi pilluaqqungaarpassi.
Qujanaq!
Stine Egede
Kommune kujallermi borgmesteri