Piffissami kingullermi kujataani ataanavissumik siallerujussuaqattaarnera pissutigalugu savaateqarfinnut aqquserngit suppunneqartarput ujaqqanillu sisoorfigineqartarlutik. Aqquserngit pinngitsoorneqarsinnaanngitsut savaatilinnit, atuartunit takornarianillu, kiisalu nioqqutissanik pilersuinermi isumannaallisaanermilu atoqqinneqarsinnaanngorlugit sanaqqinneqarnissaat aningaasatigut nammagassarujussuuvoq oqimaatsoq.
Taamaammat Kommune Kujallermi Kommunalbestyrelsip neriuutigaa savaateqarfinni aqquserngit sanaqqinneqarnissaannut aningaasatigut immikkut ittumik tapersiinissamik saaffiginnissuterput Naalakkersuisut tigulluarumaaraat.
Namminersorlutik Oqartussat kommunillu ukiut tamaasa immikkoorsittagaasa missaat sanaqqiinernut atorneqartartut naatsorsuutigineqarpoq. Aningaasat tamakkerlutik ukioq manna atorneqareerput hunnoruju tusindtillu arlallit sanaqqiinermut atorneqartariaqarlutik.
Piaartumik akineqarnissarput neriuutigalugu
Stine Egede, Borgmesteri