Kommune Kujallermi sulisunut inissiat iserterfigineqarnissaminnut piareertut borgmester Stine Egedep nuannaarutigai.
-Nuannaarutigaara inissiat nutaaffaariit maanna sulisutsinnik najugarineqarsinnaanngornerat. Sulisorisatsinnummi ininik pitsaasunik najugaqartitsiniarneq ilaatigut ajornartorsiutaasarpoq, tamannalu pissutigalugu sulisut pikkorissut ilaatigut nuuttarneranni annaasinnaasarpagut; taamaattumik inissiat nutaat piareernerat sulisut pitsaasunik ineqarnissaannut qulakkeerinneqataassammata nuannaarutigeqaakka, Kommune Kujallermi borgmesteri Stine Egede oqarpoq.
Qaqortumi Qummumi kommunimi sulisunut inissialiarineqartut 2019-ip naajartulernerani sanaartorneqarlutik aallartittut maanna iserterfigineqarnissaminnut piareerput.
-Inissiat maanna iserterfigineqarnissaminnut piareertut suliarineqarnerat pilersaarutaasumit sivisuneruvoq, matumani coronap nalaani atortussanik tikisitsiniarnermi kinguaattoornerit peqqutaasut ilagaat. Sanaartortuniit inissiat nutaaviit tunniunneqaqqamerput, taamaalillunilu attartortussaminnit iserterfigineqarsinnaanngorlulutik, Teknikkimut avatangiisinullu ingerlatsivimmi Sanaartornermut pisortaq Josef Kreutzmann oqarpoq.
Nanortalimmi Narsamilu kommunimi sulisunut inissianik siunissami sanaartornissaq pilersaarutaavoq.