Nanortalimmi, Qaqortumi Narsamilu pisiniarfiit anginerit silataani qillertuusanut igalaaminernullu immikkoortiteriviusunik eqqaaveqarpoq, taakkulu iluamik atorneqanngikkaangata piffissaq sulisut suliassanut allanut atugassaraluat immikkoortiterinermut atorneqartarpoq.
- Ullut arlallit qillertuusanik, igalaamernik plastikkinillu immikkoortiterinerujussuaq atorsinnaasarparput, taamaasilluni allanut piffissarigaluarput immikkoortiterinermut atortariaqartarparput, Qaqortumi Tigooraavimmi aqutsisoq Finn Olesen oqarpoq.
Nanortalimmi, Qaqortumi Narsamilu qillertuusanut igalaaminernullu eqqaaviit saniatigut illoqutigiinnut tamanut eqqakkanut avatangiisinut mingutsitsisinnaasunut karsinik aappaluttunik agguaasoqarnikuuvoq.
Pinngortitamut avatangiisimullu mingutsitsinnginnissaq qulakkeerniarlugu eqqakkat immikkoortillugit igittaraani isumatusaarnerussaaq.