Kommune Kujallermi Inunnik Isumaginnittoqarfimmut saaffiginnissagaanni piffissarititaasup iluani saaffiginninnerit pisassasut Isumaginnittoqarfiup pisortaa oqariartuutigaa.
Kommune Kujallermi Inunnik Isumaginnittoqarfimmut saaffiginninniaraani Meeqqanut Inuusuttunullu sullissivimmut, Innarluutilinnut sullissisunut imaluunniit utoqqarnut sullissisunut saaffiginnittoqarsinnaasarpoq.
- Piffissami kingullermi Kommune Kujallermi innuttaasut Isumaginnittoqarfimmut saaffiginnikkaluarlutik iluatsitsisannginnginnerat oqariartuutigineqarluni uagutsinnut apuunneqartarpoq. Taamaattumik saaffiginniffissat qaqugu pisarnerat innuttaasunut saqqummiutissallugu maanna tulluartuuvoq, Isumaginnittoqarfimmi pisortaq Nielsine Petersen oqarpoq.
Isumaginnittoqarfimmi sullissisut sapaatip akunnerata ingerlanerani saaffiginnissutinik, misissuinernik oqaloqateqarnernillu aaliangersimasunik suliaqartarput, saaffiginniffissallu piffissami aaliangersimasumi piffissaligaapput.
- Sullissinneq, oqaloqatiginninneq, misissuineq allaffissornerlu toqqammavigalugit piffissaq aaliangersimasoq oqarausaatikkut sullissisinnaaneq atuutsinneqalerpoq, tassa ulluinnarni nal. 14.00-miit 15.00 tungaanut. Ullup sinnera oqarasuaat matoqqasarpoq, tamatumani pissutaavoq sullitanik oqaloqatiginninnerup inissaqarluartariaqarneranik, taamatuttaaq suliassat inatsit toqqammavigalugu sullissineq ingerlanniassagatsigu, Nielsine Petersen oqarpoq.
Kommune Kujallermi Isumaginnittoqarfimmut saaffissat takuneqarsinnaapput.
