Angut pineqartoq tassaavoq Anguteeraq Høegh-Olsen, piffissami sivitsortumi nammineq piumassutiminik atuarfimmut tunissuteqarluni pajuguteqartartoq.
-Tasersuup Atuarfiani ulluinnarni takukulanngilarput nammineq piumassutsiminnik atuartunut iluaqutaasussamik tunissuteqartoqartarnera. Taamaattumik Anguteeqqap nammineq piumassutiminik atuarfimmut tunissuteqartarnera maluginianngitsoorsimanngilarput, Tasersuup Atuarfiani atuarfiup pisortaa Bettina Abelsen Hansen nassuiaavoq.
Anguteeraq Høegh-Olsenip piffissami sivitsortumi atuarfimmut tunissuteqarluni pajuguteqartarnermini arlaleriarluni naatsitanik tunissuteqartarsimavoq. Taakkulu meeqqanut taquaqanngitsunut iluaqutissatut tapertaasarput.
-Meeqqat ilaat taquaqaratik atuariartorsinnaasarput, pisariaqartitisunullu nerisassanik aallerfiusinnaasumik peqarpugut. Anguteeraq naatsitanik pajuguteqartillugu pajugutai meeqqanut iluaqutissanngorlugit agguaassassanut tapertaasarput. Taama ajunngitsuliortarnera qujanartaqaaq, taamaaliortarnerami meeqqanut pisariaqartitsisunut iluaqutaasarpoq, Bettina Abelsen Hansen oqarpoq.
Anguteeraq Høegh-Olsen meeqqanut pisariaqartitsisunut iluaqutaasumik pajuguteqartanini aammaarlugu sapaatip akunnera kingulleq kamippanik nutaanik atuarfimmut tunissuteqarpoq.
-Anguteeqqap kamippaat nutaat arfineq pingasut atuarfimmut tunissutigai, taakku pisariaqartitsisunut tunniunneqassapput. Anguteeqqap nammineq piumassutiminik ajunngitsuliortarnera nuannersoq pillugu atuarfitsinni sulisut sinnerlugit qutsavigingaarpara, taamaaliortarnerami isumaqaqaaq, Bettina Abelsen Hansen qujamasulluni oqarpoq.