Suliffeqarnermi periusissiamut ilanngussassat pillugit 21. april 2022 Kommune Kujalleq isumasioqatigiisitsivoq. Isumasioqatigiinnermi, attaveqaatit atorlugit illoqarfinnit pingasunit ataatsikkut peqataaffigineqarliuni ingerlanneqartumi, peqataapput kommunip ingerlatsivii kiisalu suleqarfiit, ISG aanmalu Sulisitsisut.
Suliffissaqartitsiniarnikkut aporfiit Majoriamiit saqqummiunneqarput, tassanilu sullissinermi, meeqqerivinni, utoqqaat isumagineqarneranni, sanaartornermilu sulisussaaleqineq eqqaaneqarpoq. Tamatuma saniatigut ilinniartut amerlanerusut ilinniakkaminnik naammassinnitarnerat eqqarsaatigalugu aporfinnik qaangerniagassaqarpoq.
Apriilip qaammataani kommunimi suliffissaaleqisut 253-iupput (Nanortalimmi 44, Qaqortumi 113 kiisalu Narsami 60, nunaqarfinnilu 36-it).
Suliffissaaleqisut pillugit sulinerup nukittorsarneqarnissaanut pitsanngorsarneqarnissaanullu peqataasut amerlaqisunik siunnersuutissaqarput, ilaatigut tamakku tassaapput:
- Suliffissaaleqisut pillugit kommunip sulinerani suliassaqarfiit assigiinngitsut suleqatigiinnerat pitsanngorsarneqartariaqarpoq, soorlu kommunimi qaammatikkaartumik naapittarnikkut ilisimasanik agguaaqqatigiinnerit kiisalu anguniakkanik aqutsinerit aqqutigalugit
- Sulinermut piginnaanngorsaqqitanik tigusisarnermut suliffeqarfiit pikkorinnerulertariaqarput, soorlu ilitsersuisoqartitsisarnerit kiisalu aqqutissiuisutut ilinniarnerit aqqutigalugit
- Iliuusissatut pilersaarusiornermi inuusuttut imaluunniit suliffissaaleqisut tunniussimalluni kajumissuseqalersitsiviusumillu suleqatigineqarnissaat qularnaarneqartariaqarpoq
- Maligassiuisunik atuineq
- Inuusuttut 18 aamma 25 akornanni ukiullit immikkut sammineqartariaqarput
Sulisumik tikisitsiumalluni qinnuteqaatit pilertornerusumik suliarineqartarnissaannik Qaqortumi Sulisitsisut kissaateqarput, taavalu mittarfiliornissaq tamatumalu kinguneri inissianik pisariaqartitsinermi kommunillu suliffeqarneq pillugu periusissiornerani isiginiarneqartariaqarput.
Borgmester Stine Egede oqarpoq: "Kommunalbestyrelsip suliffeqarneq pillugu periusissaanut ilanngussanik pitsaasunik amerlasuunik tigusaqarpugut. Suliaq aatsaat aallartilaarpoq ukiarulu atuuttunngortereersinnaasatsinnik periusissiaqalernissarput sulissutigissavara."