Isumaginninnermut Ataatsimiititaliami suliat pillugit innuttaasut malinnaatinneqarnissaat periarfissiuunniarlugu matumuuna nuannaarutigaara ataatsimiititaliap anguniagaasa ilaannik killiffik saqqummiussinnaagakku.
Isumaginnittoqarfimmi sulianik susassaqarfiit ataanni isumalioqatigiissitat makku pilersinneqarnissaat Isumaginninnermut Ataatsimiititaliap akueraa:
a) Innarluutilinnut tunngasunik susassaqarfik
b) Meeqqanut susassaqarfik
c) Pisortanit ikiorsiissutit
d) Utoqqalinersiutit
e) Siusinaartumik pensiuunisiaqarneq
Isumalioqatigiissitat tassaapput soqutigisaqaqatigiit atuisooqatigiillu, taakkulu suliniutitta anguniarnissaannut suleqataassapput.
Nanortalimmi ilaqutariit illuat.
Nanortalimmi ilaqutariit illuat nutaaq piviusunngoraluttuarpoq, taannalu innuttaasunut annertuumik pingaaruteqartussaavoq. Qularutiginngilara pikkorisssarnernut katsorsartinnernullu peqataanissamut kajuminneq suli annertunerulissasoq, taamaalillutillu perorsaaneq eqqarsaatigalugu angajoqqaat annerusumik akisussaaffeqarnerulerlutik. Ilaqutariit Illuat nutaaq aqqutigalugu meeqqat inuusuttullu sammisassaqarnissaannut neqeroorutitigut periarfissagissaarnerulernissaat periarfissaalissaaq. Kommune maannakkut siunertamut tamatumunnga pisiniarluni suliniuteqarpoq.
Kommune Kujallermi kinguaassiutitigut kanngutsaatsuliorfigitissimasut.
2022-mi kinguaassiutitigut kanngutsaatsuliorfigitissimasut katsorsarneqarnissaat siunertaralugu Isumaginninnermut Aqutsisoqarfik aamma Kommune Kujalleq suleqatigiinnissamik isumaqatigiissut atsiorpat.
Apriilip 24-at aallarnerfigalugu tarnip pissusaanik immikkut ilsisimasalinnit katsorsaanerit aallartinneqassapput, tarnillu pissusaanik immikkut ilisimasallit kommunimut tikittussaassapput. Maannakkuugallartoq suleqatigiinnissamik isumaqatigiissut ukiup 2023-p tungaanut atuuttussaavoq.
Nanortalimmi Innarluutillit najugaqatigiiffiat.
Nanortalimmi innarluutilinnut najugaqatigiiffik najugaqarfinnut pitsaanerusunut nuunneqarpoq, nuannaarutissaavorlu taamatut nuussineq innarluutillit peqqinnerullutik inuuneqarnerannik kinguneqarsimammat.
Utoqqaat nammineernerusut najugaqarfiat.
Nuannaarutissaavoq najugaqatigiiffiit atorunnaarsinneqartut qimallugit Nanortalimmi utoqqaat nammineernerusut maannakkut peqqinnarneerusuni najugaqarfeqalermata.
Meeqqanut susassaqarfimmi suliniutit annertusarnerat
Kommunini meeqqanut susassaqarfinni suliniutit pitsanngorsarniarlugit 2022-miit 2024-mut ataatsimoortumik tapiissutit 5,0 mio. koruunit immikkoortinneqarput. Meeqqanut inuusuttunullu susassaqarfinni kommunini suliassat immikkuullarissut suli aaallartinneqanngitsut ikilisarnissaat siunertaralugu kommunit taamaalillutik tamarmik immikkut 1 mio. koruuninik amerlanerusunik ataatsimoortumik tapiissutisisipput.
Isumaginninnermut Aqutsisoqarfik missingersuutini aningaasaliissuteqarpoq, aningaasaliissutillu taakku kommunit tamarmik immikkut atorfimmut ataatsimut atussavaat.
Atorfiup siunertaa tassaavoq: Kommunini ilaqutariit sanngiitsut immikkut iluaqutaalluartumik tapersersussallugit - angajoqqaatut piginnaaneqarnerup nukittorsarnissaanut, ulluni 1000-ini naartunermut. Ilaqutariit immikkut sanngeequtillit ataqatigiissaarnissaasa nukittorsarnissaannut (ataatsimoorussamik piviusumik siusinaarluni iliuuseqarfigisassat). Ilaqutariit suliniutit (annerusumik) ataqatigiissaarneqarnerat misigissavaat (suut tamaasa eqqarsaatigalugit sullissineq).
Isumaginninnermut Aqutsisoqarfik missingersuutini aningaasaliissuteqarpoq, aningaasaliissutillu taakku kommunit tamarmik immikkut atorfimmut ataatsimut atussavaat, naatsorsuutigineqarporlu atorfinittussap 2023-p naalernerata tungaanut suliassat naammassisinnaassagai.
Sapaatiummat januaarip 20-anni Isumaginninnermut Ataatsimiititaliap Naalakkersuisoq Paneeraq Olsen ataatsimeeqatigilluarpaa, matumanilu sammisat assigiinngitsorpassuit suleqatigiiffiusinnaasullu oqaluuserineqarlutik.
Meeqqat ulloq unnuarlu angerlarsimaffinniittuut kommunimut aningaasartuutaaqisut amerlassusaat appartinniarlugu inuuniutigalugu angajoqaarsiaqartinneqartalissasut akuersissutigineqarpoq.
Meeqqat inuusuttullu angajoqqaarsianut inissinneqartartunut tunngatillugu immikkut misissuinissamut Isumaginninnermut Ataatsimiititaliaq aningaasartuuteqarsimavoq.
Misissuinerup siunertaraa suliat inatsisit malillugit ingerlanneqarsimanersut qulaajassallugu. Isumaginninnikkut misissuineq, iliuusissatut pilersaarutit taamatuttaaq aningaasaqarnikkut aalajangersakkat.