Nanortalimmi Narsamilu imminut toquttarneq pinaveersaartinniarlugu pikkorissartitsisoqarmat peqataasut katillugit 54-iupput, aaqqissuussarlu iluatsilluartoq aaqqissueqataasoq oqarpoq.
Kommune Kujalleq, Paarisa aamma inuit peqqissusaannik misissueqqissaartartut (Statens Institut for Folkesundhed) suleqatigiillutik Nanortalimmi Narsamilu ulluni pingasuni imminut toquttarneq pinaveersaartinniarlugu pikkorissartitsisoqarpoq. Kommunini sulisut suliffeqarfiillu pikkorissarnissamut neqeroorummik apuusiffigineqarput, tamannalu iluatsilluartoq Kommune Kujallermi Pitsaaliuinermut Immikkoortortaqarfimmi pisortaq oqarpoq.
- Nanortalimmi Narsamilu suliffeqarfiit arlallit aamma nammineq kajumissutiminnik peqataarusuttut pikkorissaqataapput assut nuannerpoq peqataasut arlaqarmata, Helga Nielsen oqarpoq.
Ulluni pingasuni pikkorissarnermi kisitsisit, inatsisit aamma imminornissamik eqqarsaateqarneq pillugu oqaloqateqarnissamut sakkussat pikkorissartunut ilaatigut saqqummiunneqarput. Pikkorissarnermi eqqartorneqartut imartullutillu sakkortusinnaagaluartut peqataasut imminut toqunnisamik eqqarsaateqartunut, imminut toqussimasunit eqqugaasimasunut pisariaqartitsisunullu sakkussaminnik tunineqarput.
- Eqqugaasimasunik pisariaqartitsisunillu qanoq oqaloqatiginnissinnaaneq sammineqartut ilagaat. Sulisut inuttut pisariaqartitsilissappata oqaloqatiginissaannut aamma sungiusartinneqarput,taamaalilluni ajornartorsiutit annertusitinnagit iliuuseqapallattarnissamut sakkussanik tunineqarput, Helga Nielsen oqarpoq.
Pikkorissarnerup kingorna sulineq ingerlanneqaanarnissaa siunertaralugu pikkorissarlutik naammassisut piumagunik qaammatit tamaasa pitsaaliuisunit ataatsimeeqatigineqartarsinnaapput.