Kommune Kujallermi aqqissuusaanikkut allanngortitsiniarluni sulinermi ataatsimiititaliat arfiniliusut sisamaannanngortinneqartussanngorput.
Kommune Kujallermi kommunalbestyrelse septembarip 22-anni isumasioqatigiinneranni aaqissuussaanikkut allanngortiterinissaq sammisaralugu ataatsimiinneq ingerlanneqarpoq. Matumani eqqartueqatigiinnermi isummanik pitsaasunik saqqummiisoqarluni.
- Eqaannerusumik innuttaasunut sullissinissaq pitsaasoq siunertaralugu ataatsimiititaliat arfiniliu-sut sisamaannanngortinneqarnissaat siunniupparput, innuttaasut sullissinermik pitsaasumik misigitilissagutsigit ullumikkut ingerlatseriaaserput allanngortittariaqarmat, Borgmester Stine Egede oqarpoq.
Ataatsimiititaliat arfiniliusut sisamaannanngortinniarneranni Meeqqeriveqarnermut Atuarfeqarnermut Ingerlatsivik, Kulturi aamma Majoriaq ataatsimiititaliatut ataatsimoortinneqalis-sapput; Isumaginninneq pitsaaliuinerlu ataatsimoortinneqalissapput, Teknikkimut Ingerlatsivik ullumikkutut ingerlaannassaaq. Aningaasaqarnermut ataatsimiititaliaq Innuussutissarsiornermullu suliffeqarnermullu ataatsimiititaliaq ataatsimuulissapput.
- Kommunerujussuanngornerup kingorna aaliangiisinnaassuseqarlutik oqartussat Qaqortumut nuunneqarnikuupput, taamaattumik oqartussaaqataaneq Narsami Nanortalimmilu nukittorsar-niarlugu illoqarfiup pisortaannik Nanortalimmi Narsamilu atorfinititsinikuuvugut. Ataatsimiititaliat ikilineqartussanngornerat sulisunik ikililerinermik nassataqarnavianngilaq, pitsaaneru-sumimmi sullisserusunnitsinni sulisut tamaasa atorfissaqartippagut, Stine Egede nassuiaavoq.
Aaqqissuusaanikkut allanngortitsiniarnermi suliffeqarfik Innovation South Greenland Kommune Kujallermit pilersinneqarsimasoq inerisarniarlugu Inuussutissarsiornermut ineriartornissamut ingerlatsinerit amerlanerusut ISG-mi inissisimalernissaat eqqarsaataavoq.
-Ataatsimiititaliat ikilinerisigut aaliangiisinnaasullu sumiiffinni siammarnerisigut sullissinerlu sukkanerusumik pitsaanerusumillu ingerlanissaanut ingerlariaaseqarnissatsinnut pilersaarusiussuarput, tamannalu anguniarlugu suliaq annertooq suliaralugu aallartereerpugut, Stine Egede oqarpoq.
Aaqqissuussinikkut allannguineq upernaaru naammassineqarsinnaasoq naatsorsuutigineqarpoq.
-Naatsorsuutigivarput 1. juni aaqqissuussaanikkut allannguilluni inissititserinissap piareersimanissaa. Piffissami aggersumi pisortat sulisut sinniisuisa ataatsimiititaliaat il.il. ataatsimeeqatigisassavagut naatsorsuutigaarpullu februarimi kommunalbestyrelsip siullermeerluni oqaluuserissagaa, Kommune Kujallermi pisortaaneq Tine Pars pilersaarutit pillugit nassuiaavoq.