Assi: Leiff Josefsen
Ataasinngormat oktobarip 18-ianni Kommune Kujallermi inuussutissarsiutinik ineriartortitseqatigiiffik Innovation South Greenland (ISG) immikkut ittumik ataatsimeersuarpoq, siulersuisunillu nutaarluinnarnik kujataani illoqarfinnit tamanit sinniisuutitaqartunik qinersilluni, Hans Peter Hansenilu nutaatut siulittaasunngorpoq.
Immikkut ittumik ataatsimeersuarneq manna aqqutigalugu siulersuisunik siammasissunik tunngavilinnik najugaqarfinni sumiiffigisami ilisimasaqarluinnartunik nunallu tamat akornanni ilisimasaqarluartunik katiterineq iluatsippoq.
Siulersuisuni siulittaasunngorlaaq Hans Peter Hansen nunatsinni sivisuumik angusaqarluarluni atorfeqarsimavoq. Siullermik ukiuni tallimani Maarmorilimmi aatsitassarsiorfimmi Inngili Qernertumi aamma ukiut 40-t sinnerlugit Air Greenlandimi. Siulittaasunngorlaap nunatta avataanit avataanullu toqqaannartumik attaveqartarnissap pilersinneqarnissaa angorusuppaa. Tamannalu ilutigalugu siulersuisut aamma pisortap Allan Chemnitz suleqataalu peqatigalugit suliassarpassuit naammassinissaat qilanaarai.
Kommune Kujalliup siulersuisut peqatigalugit pissutsinut siusinnerusukkut atuuttunut naleqqiullugu illoqarfinneersunik annertunerurujussuarmik sinniisuutitaqarnissaq pingaartissimavaa. Aammattaaq siulersuisunut inuussutissarsiutinit pingaarnernit sisamanit, Takornariartitsinermit, Inuussutissalerinermit, Aalisarnermit Aatsitassarsiornermit, ISG-ip suliaqarfigisaanit pisuunissaat pingaaruteqarsimavoq.
Siulersuisut sinneri tassaapput siulittaasup tullia nutaaq Neqi A/S-meersoq Ole Vestergaard, Arctic Prime Fisheriesimi pisortaaneq Hentzar Petersen, Farm Holidayimik piginnittoq Elna Jensen , Ujarassiooq Ole Christiansen, Kommunip pisortaanera Tine Pars, Blue Ice Explorerimi aqutsisoq Claus Pedersen, Nanortalik Tourismimik piginnittoq Ellen Næsgaard Madsen, Qajaq Brewery Greenlandimik piginnittoq Kattie Nielsen.
Borgmester Stine Egede ”assut nuannaarpoq suleqatigiit nutaat suliamik nangitsisussangormata kiisalu politikkikkut inuiaqatigiittullu anguniakkat Kujataata ineriartorneranut pingaaruteqaqisut Kujataani sulissutigeqqinneqarnissaannut peqataasinnaalermata."
Siulersuisut nutaat novemberip naannginnerani siullermeerlutik ataatsimiinnissaat naatsorsuutigineqarpoq.