Angerdla Kielsen Olsen nammineq kajumissutsiminik Qaqortumi meeqqeriviit ilaannut Angajumut qilaatinik tallimanik tunissuteqarpoq. Angerdlap qilaatit tunnussani nammineerluni aningaasassarsiorlugillu sanasussaannik ujartuisimavoq.
Meeqqerivik Angaju 64-inik meerartaqartoq tallimanngornermi septembarip ulluisa 17-ianni Angerdla Kielsen Olsenimit tunissuteqarfigineqarpoq.
Angerdlap meeraanerani qilaatit iikkani kusassaataallutik attoqqusaanatik assiliaataaginnartarsimapput, kalaallillu kulturitta tammatsaaliornissaa meeqqerivimmut tunisinermini siunertaraa.
- Kalaallit kulturitta tammatsaaliornissaa pingaartuuvoq, uagut meeraalluta qilaatit inniminartuupput, misigissuseq taanna kinguaatsinnut misigitikkusunngilara. Nipilersuutitut allatuulli meeqqerivinni atugassatut qilaatit piniarnikuuakka, meeqqallu nipiliortissinnaallugulu pinnguarisinnaassagaat pingaartippara, Angerdla Kielsen Olsen oqarpoq.
Meeqqerivik Aqqalu aamma meeqqerivik Inneriilat siornatigut qilaatinik tunereersimavai, Qaqortumilu meeqqeriviit tamaasa qilaatinik pajunnissai siunertaraa.
- Nipilersortartuuvunga, isumaqarpungalu allamiut nipilersoriaasaat nunatsinni malinneqarpallaartoq, siulittalu qilaat nipilersuutitut angallattarsimavaat, tamanna uagut atorpianngilarput taannalu uggorisarpara. Uagut kinaassuserput malillugu nipilersorsinnaanissaq pingaartittarpara, Angerdla Kielsen Olsen oqarpoq.
Angerdla Kielsen Olsen meeqqerivik Angajumut qilaatinik tunniussinnginnerminiSulisartut Højskolianni atuartut peqatigalugit meeqqanut erinarsuutinik atuillutik aliikkusersuipput.