Poul Bjerge 5. maj 1929-imi nuummi inuusoq 92-inik ukioqarluni Qaqortumi qimaguppoq. Poulip nuliani Bibi, sisamanik meeraqarlutik peqatigiillutik ukiorpassuarni aalajaalluni ilakkuminarlunilu inooqataasimaneranut annertuumik qujassutissaqarfigaarput.
Poul 1953-imi Upernaviarsummi atorfinilluni sulilerpoq, tassani orpinnik naatitsinermik misileraasutut aamma silasiornermik suliaqarluni. Kingorna ukiorpassuarni Upernaviarsummi pisortatut soraarninngornissami tungaanut sulivoq. Pouli orpinnik misileraalluni ikkussuingaatiarsimavoq, ilaatigut soorlu Tasermiuni, Narsarsuarmi Qanassiassanilu tamanna allaat nunatta avataaniit tusaamaneqalersimavoq. Orpiimmi taaku ullumikkut portusuukasinngorsimapput.
Upernaviarsummi naasulerineq orpilerinerlu Poulip uummateqarfigilluarlugu ineriartortilluarsimavaa, ulloq manna tikillugu Upernaviarsuk tikinneqaraanngat naatitsinerup, nunaateqarnerup savaateqarnerullu tungaatigut puujunaatsunik misigisaqarfiusarluni, ornissallugulu kajungerineqartuartarluni.
Pouli inoqatiminut maligassiuilluartuuvoq. Utoqqalinissi tikillugu pisinnaatilluni peqqissumik inuuneqarnissani pingaartitaraa, sapinngisamillu pisuttualaarnissi aallutarisarpaa.
Taamaammat Poulip suliarisarpassuisa saniatigut timimik atuilluni inuummarissarnissaq, nunaqqatigiinnut allanullu piumassusermik nukissanillu tunisiuartarnera qularutissaanngilaq.
Pouli inuk ilakkuminartuugami naapillugu uniffigilaanngitsuugassaanngilaq, ilisimasaqarluartuummallu oqaloqatiginissaa pissanganartuaannartuunikuuvoq.
Poulip nulia Bibi, kinguaavilu tamaasa misiginneqatigaavut. Poulip eqqaaneqarnera ataqqinartuuli.
Poul Bjerge kujataani pingaartumik nunaateqarnermik, naatitsinermik savaateqarnermillu ineriartortitseqataalluarsimasoq peeruppoq.
Udgivet d. 20. august 2021