Kommune Kujallermi ilinniartitsisut atuartitsinerminni iPad-imik atorluaanerunissamik pikkorissarneqarput.
Kivitsisap anguniagai aallaavigalugit misissueqqissaarinermik, pilersitseqataanermik, IT-lu atorluarnerunissaanik siunertaqartumik ilinniartitsisut, ikiortit, atuarfimmilu aqutsisut pisariaqartitaat killiffiillu aallaavigalugit sapaatip akunnerani 31-mi pikkorissartinneqarput.
IT-mik atuisinnaanerup piginnaaneqarfigineqarnerulernissaa pikkorissaanermi pingaarnertut siunertaavoq, matumani suliassat isumassarsiallu atortorissaarutit, soorlu iPadi atorlugu sungiusarnissai. Atuarfeqarnermut, Meeqqeriveqarmut Nutaaliornermullu Ingerlatsivimmi pisortaagallartup Kivitsisap anguniagai qulakkeerumavai.
-Kivitsisap anguniagai 2023-p tungaanut ingerlanneqartut qulakkeerinneqataanissatsinnut periarfissiipput, tamannalu atorlugu ilinniartitsisut tamakkerlugit pikkorissartinnissaat kissaatigisimavarput, Atuarfeqarnermut Meeqqeriveqarnermut Nutaaliornermullu Ingerlatsivimmi pisortaagallartoq Ruth Jakobsen oqarpoq.
Kommune Kujallermi ilinniartitsisut ulluinnarni atuartitsinerminni iPad atorlugu atuartitsisinnaanngornissaat anguniagaavoq.
-Ilinniartitsisut amerlanerpaartaat iPad-imik atuillutik atuartitsisinnaanngorunik ullutsinnut naleqquttumik atuartitsisinnaanngornissaat isumalluarnarpoq. Ilinniartsitsisutut sakkussat amerlaqaat, ilamininnguaraallu iPadi,kisianni iPadi atorlugu atuartut suliaqarnerminni pissarsilluartarmata ilinniartitsisunit atorluarneqarnissaa kissaatinniippoq, AMN Ingerlatsivimmi pisortaagallartoq Ruth Jakobsen taama oqarpoq.
Ulluni tallimani pikkorissarnerup annerpaartaa attaveqaatitigut ingerlanneqassaaq, tassanilu Ikiortit pikkorissartinneqassapput. Ullut marluk kingulliit ilinniartitsisut tamarmik pikkorissaanermi peqataatinneqassapput