Kaffillernasi

Qaqortumi inuit marluk covid-19-imik tunillatsissimasut uppernarsarneqarpoq.
Kommunimi inunnik sullissiviit attuumassuteqartut ilisimatinneqareerput, qanorlu iliornissamut piareersartoqareerluni.

-Kikkulluunniit kaffillinnginnissaat kaammattuutigaara. Ullumikkut atualeqqaartitsisoqartussaavoq, meeqqallu aamma angajoqqaat ullorsiornertik malunnartikkusussappassuk paasisinnaalluarpara. Kisianni ullumikkut illoqarfimmi kikkut tamarmik peqataaffigisaannik kaffillissanngilagut. Qaniginerpaasasi peqatigalugit ullorsioritsi, borgmesteri Stine Egede kaammattuivoq.

Tuniluunnerup ingerlaarnera kommunip qanimut malinnaavigaa, pisariaqartumillu qanoq iliornissamut piareersaasiortoqassaaq.

-Qujanartumik amerlasuut akiuussutissamik kapitereerput, taamaammat neriuppugut annertuumik tuniluunneq killilerneqarsimatinneqarsinnaassasoq. Taamaallaat akiuussutissalersuineq aqqutigalugu tuniluunneq annertooq killilersimaartissinnaavarput, Stine Egede oqarpoq.