Kommune Kujallermi Isumaginninnermut Ingerlatsivimmi aamma Atuarfeqarnermut Meeqqeriveqarnermut Nutaaliornermullu Ingerlatsivimmi (AMN) atorfinitsitsisoqarpoq.
Pisortatut atorfinittussat marluk tamarmik misilittagaqarluarput, tamannalu borgermesterip Stine Egedep isumalluarfigaa.
-Nuannaarutigaara ingerlatsiviit pisortaagallartunit aqunneqartut inuttalerneqartussanngormata misilittagaqarluarnerannullu isumalluarlunga, qilanaarpungalu qanimut suleqatigilernissaannut borgmesteri Stine Egede oqarpoq.
Isumaginninnermut Ingerlatsivik
41-nik ukiulik Nielsine Petersen isumaginninnermi siunnersortitut ilinniagaqartoq meeqqanullu suliat pillugit pikkorissarnernik ilinniaqqinnermillu tunuliaqutaqartoq, Isumaginninnermut Ingerlatsivimmi pisortanngortussanngorpoq.
Siusinnerusukkut Kommune Kujallermi meeqqanut inuusuttunullu isumaginninnermik aqutsisutut aamma isumaginnittoqarfimmi pisortaagallartutut sulinermik misilittagaqareerpoq.
Nielsine Petersen Kommuneqarfik Sermersuumi avataaniit siunnersortitut atorfini qimallugu Kommune Kujallermi pingasunngornermi septembarip aallaqqaataani Isumaginninnermut Ingerlatsivimmi pisortanngussaaq.
AMN
Kommune Kujallermi Atuarfeqarnermut Meeqqeriveqarnermut Nutaaliornermullu Ingerlatsivimmi pisortanngortussaq 53-inik ukiulik Jesper Ryttov Sisimiuni Minngortuunnguup atuarfiani pisortatut sulereerluni Kommune Kujallermi AMN Ingerlatsivimmi oktobarip aallaqqaataani atorfinissaaq.
Jesper Ryttov ilinniartitsisutut aqutsisutullu ilinniagaqarpoq, ukiunilu arlalinni Danmarkimi aqutsisutut misilittagaqarluarluni.