Ulluni makkunani COVID-19 kujataani tuniluuppoq, maannamullu kujataani tunillatsissimasut qulit sinneqalereerput.
Apeqqutaanerpaanngilaq tunillatsissimasut sumiinneri, pingaarnerpaavorli illoqarfimmiikkaanni nunaqarfimmiikkaani savaateqarfimmiikkaanniluunniit mianersornissaq, inunnullu attuuteqattaannginnissaq.
Maannamut Qaqortoq, Narsaq Narsarsuarlu tunillatsisimasunik nassaarfioreerput, pisortallu peqqussutaannik malinninnissaq aatsaat taama pingaaruteqartigaaq.
Nunatsinni nakorsaaneqarfik, peqqinnissaqarfimmi sulisut aamma politiit tuniluunneq misissuiffigalugu ulapittorujussuupput. Inuit ulloq unnuarlu tuniluunnerup aqunneqarsinnaanngornissaanik siunertaqarlutik sulisut qamanngavik qutsavigerusuppakka. Nukik annertoorujussuaq atorlugu sulisut ilisimagakku. Sullissinermut taama annertutigisumut inuiaqatigiit tamatta tapersiilluta suleqataanissarput inissaminiippoq.
Tunillatsissimasunik qanillisaqarsimasut misissortereersimasullu tunillatsissimannginnerminnik paasisaqarsimasut kaammattorusunnarput angerlarsimaannarallarnissaannik, ullualuimmi ingerlaneranni tunillatsissimaneq aatsaat ersiuteqalersinnaasarmat. Allaammi ilaqaratta tunillatsikkaluarlutik ersiuteqarneq ajortunik, taamaattumik mianersoqatigiinnissarput pisariaqaqaaq.
Nunatsinni Nakorsaaneqarfik suleqatigalugu Qaqortumi misissuisarfimmik ammaanikuuvugut, periarfissarlu atorluarneqarumaartoq neriuutigaara, innuttaasummi amerlasuut misissortinnerat tuniluunnerup aqunniarneranut iluaqutaassammat.
Angajoqqaat qinnuigerusuppakka meeqqaminnut killilersimaarinneqqullugit, meeqqammi aqqutigalugit tuniluunneq aamma ingerlalertorsinnaammat.
Sanngiinnerusortagummi illersorniarlugit iliuuseqaqataasariaqarpugut, peqqinnissaqarfinnimi sulisut ulapereersut qaavatigut suliakkeqqinneqarnissaannut aqqutissiiuussissannginnatta.
Taamaattumik innuttaasut kapitissimanngitsut akiuussutissamik kapineqarnissaannik kaammattoqqikkusuppakka, ilisimasat takutimmassuk kapitissimasut akornanni tunillaassuinissaq annikinerusoq, tunillatsissimagaannilu timi akiuussutissaqarluartartoq.
Tuniluunnermi annikinnerpaamiitinniarlugu akisussaaqatigiinnerput pinngitsoorsinnaanngilarput, naammagittarlutalu ullut makku atortariaqarpagut. Taamaaliornitsigummi ullut sungiusimanerusatta uterfiginissaannut piffissaq sivikinerussammat.
Pisortat peqqussutaannik malinnilluta eqqiluisaarluarnissarput, inunullu akulerusimanata mianersornissarput pisariaqarluinnarmata malinninnissarput eqqaasitsissutigeqqissavara.
Tamattatoq paaraluta akisussaaqatigiinnitsinnik suleqataarusussusermillu ulluni makkunani takutitsilluarisa. Misissortiffinnilu sivisuumik utaqqisariaqartartut aamma qujaffigaassi naamagittarlusi, paasinnillusilu akisussaaqataanissinnut.
Stine Egede, borgmesteri