Narsarsuarmiit Københavnimut, Københavnimiillu Narsarsuarmut aasaq manna toqqaannartumik angallassisoqartussaannginnera akuersaaginnarneqarsinnaanngitsoq Kommune Kujallermi inuussutissarsiornermut suliffeqarnermullu ataatsimiititaliami siulittaasoq isumaqarpoq.
-Kujataani angallanneq eqqarsaatigalugu Air Greenlandip sullissinermini kujataanik kingulliutitsiuarnera akuersaaginnarneqarsinnaanngilaq, tamannami takornarialerinermik suliaqartunut ulluni makkunani eqqugaaqqareersunut annertuumik sunniuteqarnerluttussaavoq, Inuussutissarsiornermut suliffeqarnermullu ataatsimiititaliami siulittaasoq Simon Simonsen oqarpoq.
Narsarsuarmiit Københavnimut toqqaannartumik angalaniarlutik inniminniisimasunik juuli naallugu timmisartoq ulikkaaqqagaluarpoq, taamaakkaluartorli aasaq manna Narsarsuarmiit Københavnimut toqqaannartumik angalanissat Air Greenlandimit unitsinneqarput.
-Angalasussat ikippallaarnerannik tunngavilersuiniarneq eqqorpallaanngilaq, juulimi naallugu angalasussaqaraluarpoq. Tamanna takornariaqarnermik suliaqartunut kujataamiunullu angalasussanut matussineruvoq. kujataanummi kujataaniillu angalaniartunut piffisarujussuarmik atuiffiulertussaavoq, tamanna akuersaarneqaannarsinnaanngilaq, Simon Simonsen oqarpoq.
Kujataaniit kujamullu angalaniarnermi bilitsit akiisa akisunerujussuat eqqarsaatigalugu Naalakkersuisut iliuuseqartariaqarnerat ataatsimiititaliap siulittaasuata ujartorpaa.
-Tamanna atuutsinneqassappat minnerpaamik kujataaniit angalasut Narsarsuarmut Narsarsuarmiillu toqqaannartumik angalanermi bilitsit akiisa assinganik akiliinissaat, timmisartumilu inissat amerlanerit Naalakkersuisut qulakkeertariaqarpaat, kujataamiuusugummi ukiuni kingullerni nunatta timmisartuutileqatigiiffianiit tunulliunneqartuartarnerput unitsinneqartariaqalerpoq, Simon Simonsen naggasiivoq.