Ulluni makkunani nualluutip Covid-19-ip tuniluutinnginnissaa siunertaralugu inuiaqatigiit akornanni mianersortoqarnera paarisoqarneralu malunnaqaaq. Tamanna aamma Kommune Kujallerminngaaniit taperseqqillugu kommune utoqqarnut immikkut iliuuseqarpoq.
-Nualluutip tuniluutinnginnissaa siunertaralugu tamatta suleqataasariaqarpugut, inuiaqatigiinnimi sanngiinnerusortagut utoqqartagullu ikioqatigiinnitsigut paarisariaqarpagut, taamaammat Kommune Kujallermi utoqqaat utoqqalinermusiffigisartagaat ullormik ataatsimik siusinnerusumik pisassasoq aaliangiussaqarpugut, borgmester Kiista P. Isaksen oqarpoq.
Qaammatip naanerani utoqqalinersiutisisoqaraangat sulisartorpassuit aamma qaammammusisarput, maannali qaammatit tulliuttut sisamat utoqqaat siulliullutik aningaasarsiffigisussanngorpaat.
-Qaammammusisoqartillugu utoqqalinersisoqartillugulu niuertarfiit inoqartaqaat, taamaammat utoqqaat eqqissillutik niuerniarsinnaanissaat siunertaralutigu qaammatini tulliuttuni sisamani utoqqalinersiat ullormik ataatsimik siusinnerusumik tunniunneqartalissapput, ullunimi makkunani utoqqartatsinnut illersuinissarput pingaaruteqaqaaq, Kiista P. Isaksen oqarpoq.
Kommune Kujallermi qaammatini tulliuttuni sisamani utoqqalinersiutisiffissat:
marsip 30-at, apriilip 29-at, maajip 28-at aamma juunip 29-at.