Eqqagassanik tigooraaviit / Atoqqitassanngortitsiviit
Kommune Kujallermi eqqagassanik tigooraaviit atoqqitassanngortitsiviilluunniit 14-iupput, tassa illoqarfinni nunaqarfinnilu tamani ataasiusarlutik, illillu piumalleruit taakkununngarsinnaavutit eqqaallutillu.
EQQASSANIK TIGOORAAVINNI / ATOQQITASSANNGORTITSIVINNI IMMIKKOORTITERISARNEQ
Eqqagassanik tigooraavinnut atoqqitassanngortitsivinnulluunniit pitinnatit eqqagassanik immikkoortiterisimanissat iluassaaq. Igitassatit minnerpaamik eqqagassanut assigiinngitsunut makkununnga immikkoortitersimassapput:
- Eqqakkat matoorneqarsinnaasut (ass. asbest, PVC aqitsoq, kiffiutissat, qarmat, sukuluisaarnermut tunngasut)
- Assakaasut qalequtai saviminertaqanngitsut
- Igalaamerngit puiaasallu
- Savimerngit
- Issoq
- Eqqagassat navianartut
- Eqqagassat mikisualuit ikuallassinnaasut
- Eqqakkat angisuut ikuallanneqarsinnaasut
- Qalorsuit qassutillu oqimaalutaqanngitsut
Eqqagassatit Qaqortumi, Narsami, Nanortalimmiluunniit kommunip atoqqitassanngortitsiviinut igissagukkit igitassatit nioorartinnagit sulisut attavigeqqaartassavatit. Eqqagassalerivimmi sulisup eqqagassaatitit eqqortumik immikkoortiterneqarsimanersut nalilissavai, taavalu atoqqiivimmi eqqakkat sumut inissinneqassanersut innersuussutigissallugit.
Nunaqarfinni kommunip eqqagassalerivianut igitsiniaruit Sullissivik attavigeqqaassavat. Sullissiviup oqaluttuutissavaatit igitassatit sumut inississaneritit.
Arlaannik immikkut eqqumaffigisassaqarpunga?
Inuppassuit kommunip eqqagassanik tigooraavianiit eqqakkanik iluatissarumasarput isumaqartaramik eqqakkanik atoqqiineq aningaasanik ileqqaarutaassasoq avatangiisinullu pitsaassasoq, kisianni tamanna unioqqutitsineruvoq, tamatumunngalu pissutaasut qassiiupput:
- Eqqagassat kommunip eqqagassanik tigooraavianut iginneqaraangamik kommunimit pigineqalersarput. Kommune eqqakkanik nioqquteqarluni eqqagassalerinermut eqqagassaleriviullu ingerlanneqarneranut atugassanik isertitaqarsinnaavoq. Kikkulluunniit eqqakkanik tigusiinnarsinnaagaluarpata naleqarnerpaat, soorlu savimerngit, iluatigineqartassagaluarput. Taama pisoqarpat eqqagassalerinermut akit qaffassapput, tassami kommunip eqqagassalerinermut aningaasartuutit tamakkerlugit isumagisarai, kisiannili iluatissakkat isertitsissutaanissaraluat annaassallugu.
- Allanit tiguneqartussaanngitsunik kommunimi innuttaasut igitsiartorsinnaatitaapput. Tassaasinnaapput inuk pillugu paasissutissat oqarasuaatini angallattakkani, qarasaasiani, pappiaqqani pisoqqani allanilu toqqortaasut. Imaluunniit inuup nammineq pigisai nammineq pissuteqarluni aserortertikkumasai.
- Kommunimi inuit suliffeqarfiillu tamarmik kommunip eqqagassaassivianut igitsinissamut akiliisarput, kommunillu eqqakkat isumagisassarilersarpai, tamannalu naapertorlugu eqqakkat suliarineqassallutik.
- Kommunip eqqassaganik tigooraavii susassaqanngitsut isumannaatsuunissaanik qularnaariviusussanngorlugit aaqqissugaanngillat, taamaammat eqqakkanik tigooravimmiittoqartariaqanngilaq akuerineqarsimanngikkaanni, taamaappallu sulisut tikiunnermi attavigineqartassapput.
Akiliutit
Kommune Kujalleq illoqarfinni nunaqarfinnilu eqqagassanik tigooraavinni atoqqitassanngortitsivinnilu atugassarititaasunik assigiissaarisimavoq. Tamatuma malitsigisaanik inoqutigiit tamarmik kvartalikkaartumik akiligassinneqartalerput eqqassanik tigooraavinnik atoqqitassanngortitsivinnillu ingerlatsinermi aningaasartuutaasunut matussutissaasunik.
Eqqagassalerinermut akit kommunimi akigititat nalunaarsuiffianniipput. Kommunip sullissinerinut akiliutit qaqugukkulluunniit atuuttut kommunip nittartagaanit uani aaneqarsinnaapput imaluunniit Teknikkeqarfimmut Sullissivimmulluunniit saaffiginninnikkut pissarsiarineqarsinnaallutik.
Eqqagassalerinermut ilaasutut nalunaarsimasunut qaammatit pingasukkaarlugit akiligassiisoqartarpoq.