Paasissutissat nalinginnaasut

INIp inissiat Namminersorlutik Oqartussanit kommuninillu pigineqartut allaffissuussarai. Kitaani immikkoortortaqarfiit katillutik 160-it missaanik amerlassusilinnik sulisoqarput, inissiallu 9.000-ingajannik amerlatigisut allaffissuunneqarlutik.

Inissarsiortutut INIp utaqqisuinut allatsissinnaavutit.

Utaqqisunut allattorsimaffimmi sivisunerusumik utaqqisuniissimasut pingaarnerutinneqarnissaannut qulakkeerutaavoq. Utaqqisuniinnissamut arlalinnut akiliillutit allatsissinnaavutit. Utaqqisut allattorsimaffii illoqarfikkaarlugit/nunaqarfikkaarlugit, immikkoortortaqarfikkaarlugit kiisalu Namminersorlutik Oqartussanit kommuninillu pigineqartunut agguagaapput.

Utaqqisut allattorsimaffiannut allatsinnissamut piumasaqaatit

INImi inissarsiortutut utaqqisunut allatsinniaruit "Utaqqisut allattorsimaffiannut allatsinneq"  immersoriarlugu ini@ini.gl –imut nassiussinnaavat imaluunniit imminut kiffartuussivitsigut atuisumik nutaamik sanasillaavutit. Inissiaq neqeroorutigineqartoq inoqutigiissinnut tulluartussaavoq, ass. kisimiittuullutit sisamanik initalimmik neqeroorfigineqassanngilatit. Inoqutigiikkaanut inissianut allattukkat uani takusinnaavatit. 15-inik ukioqalereersimaguit inissarsiortutut allatsereersinnaavutit. Aatsaalli 18-ileereeruit inissiamut neqeroorfigineqarsinnaalissaatit.

Akiligassaq

Utaqqisunut allatsinneq ataaseq 100 kr-qarpoq.

Akiliut ukiumut akiliiffiusumut atuuppoq.
Tassa imaalluni januarimi novembarimiluunniit akiliigaluaruit, ukiumi nutaami utaqqisut allattorsimaffiat nutarterneqarpat akileeqqissaatit.

Ukiup naanerani akiligassaq nassiunneqartarpoq. Inissarsiortuuginnarumallutillu decembarip 31-ani akileereersimassaatit.

Attaveqaatitigut qinnuteqaatit nassiunniarukku (MitID-eqaruit)

Imminut kiffartuussivitsinni atuisutut allatsikkuit isertaatit nassiunneqartut ulluni 30-ni atuutsissapput. Atuisutut isersinnaanerit qulakkeerniarlugu isertaatit qaangiutinnginneranni MitID-ppit atuutsilereersimanissaa pingaaruteqarpoq. Eqqaamallugu MitID atuutsilerukku isertaatigilissagakku.

Ornigullutit qinnuteqaatit tunniukkiartorniarukku (MitID-eqanngikkuit)

MitID suli atulersimanngikkukku atortussaajunnaarsimagukkuluunniit immersugassap immersorneratigut utaqqisunut allatsissinnaavutit: "Utaqqisut allattorsimaffiannut allatsinneq"

Immersugaq ini@ini.gl-imut nassiutsissavat, imal. INImut ornigullutit tunniukkiartorlugu.

Suliarinneriaaseq

Imminut kiffartuussivitsinni atuisunngoreeriaruit utaqqisunullu allatsillutit ilaatigut makkununnga atorsinnaalissavat:

• Utaqqisuni qassimiinnerlutit
• Inissianut neqeroorutit
• Inissiat inoqanngitsut
• Utaqqisuniinnerit unitsikkallarlugu

Inissianut neqeroorut

Inissiaq inueruppat, utaqqisuni sivisunerpaamik allatseqqasimasoq, inueruttumilu najugaqarfeqarfimmut allatseqqasoq siulliunniarlugu neqeroorfigisarparput. Neqeroorfigineqartuni soqutiginnillutik nalunaartuni sivisunerpaamik utaqqisuniissimasoq neqeroorfigineqassaaq.
Inissiamut neqeroorut e-mailikkut tigungukku aamma imminut kiffartuussivikkut takusinnaalissavat.

Inissiamut neqeroorut ataatsikkut arlalinnut nassiuttarparput, inissarsiortunut sukkanerusumik inissaqalersitsinissaq utaqqisuniinnerullu sivikinnerulernissaa qulakkeerniarlugit.

Qularnaveeqqusiissut

Qularnaveeqqusiissut qaammatini pingasuni ineqarnermut akiliutigineqartup annertoqatigaa. Qularnaveeqqusiissut inissiamut nutsinnginnerni akilereersimasussaavat. Isumaqatigiissuteqarnikkut akilersugassanngortinneqarsinnaavoq.
Inissiamut iserterninni inissiami ajoqutinik amigaatinilluunniit immersugassaq immersussavat. Taanna inissiami najugaqarninni ajoqutinik amingaatinillu pilersitsisimannginnermut, taamaalillutillu aningaasartuutiginnginnissaannut uppernarsaataasussaavoq. Taamaammat najugaqarnerit tamaat immersukkap pigiinnarnissaa eqqaamassavat.
Inissiap qimannerani nutsernermut atatillugu misissuisoqareerpat, inissiallu iluarsartuunneqarsimaneranut, paarsinerlunnikkut iluarsaatassat isumagineqareerpata kiisalu iluarsaassisoqarneranut suliaqartoqarsimatillugu akiligassiat naammassereerpata ineqarnermut qularnaveeqqutip sinneri ilinnut utertinneqarumaarput.

Maalaaruteqarneq

Ineqarneq pillugu maalaarnissamut ataatsimiititaqaliaqarfiup kommunit imaluunniit Namminersorlutik Oqartussat inissiat attartortittagaannut tunngasut aalajangerneqarsimasut suliarisarpai.

Uunga maalaarummik nassiussisinnaavutit: maalaarut@nanoq.gl

Maalaarutinni ilanngutissavatit:

• Aalajangiisoqarneranut sooq maalaaruteqarnerlutit tunngavilersuinitit
• INI A/S-imiit aalajangiisoqarneranut allakkat assigisaalu