Nalinginnaasumik paasissutissiineq
Akiliisitsiniartarnermi immikkoortortaqarfik pisortaqarfiuvoq inunnik ataasiakkaanik suliffeqarfinnillu pisortanut akiitsulinnik sullissisoq oqartussaqarfik.
Pisortat oqartussaasui tassaasinnaapput:
- Namminersorlutik Oqartussat immikkoortortaqarfiilu, soorlu INI aamma Nukissiorfiit
- Kommunit
- Nuna, Kalaallit Nunaata akiliisitsiniartarnermi isumaqatigiissuteqarfigisai, assersuutigalugu akiitsunut akileraarutinut, akitsuutinut meeqqanullu akilersuutinut
Akiliisitsiniartarnermi immikkoortortaqarfimmit pisortanut akiitsut assigiinngitsut akiliisitsiniaanermi isumagineqartarput.
Inuit ataasiakkaat akiligassaannut Akiliisitsiniartarnermi immikkoortortaqarfimmit ikiorsiisinnaapput. Matumani pineqarput aapparisamut meeqqanullu akiligassat saniatigut akilersuisussanngortitaasimasunut.
Kontut assilineri assigiinngitsut pingasut aasinnaavatit:
- AKI – Akiliisitsiniartarfiup kontuata assilinera
- SEL – Akileraartarnermut Aqutsisoqarfiup kontuata assilinera
- SEL – Qitiusumik Naatsorsuuseriffiup kontuata assilinera
Pisortanut akiitsut
Pisortanut akiitsut tassaasinnaapput:
- Akileraarutinut akitsuutinullu akiitsut
- Aapparisamut meeqqanullu akiitsut
- Ilinniartuunermi taarsigassarsianit akiitsut
- Ineqarnermut inuussutissarsiorsinnaanermullu atukkanit akiitsut
- Ineqarnermut akiitsut
- Innaallagissamut, imermut eqqagassalerinermullu akiitsut
- Meeqqat paaqqinnittarfiinut akiitsut
- Nunanut avannarlernut akiligassat akilinngisat, ass. meeqqanut akiligassat akileraarutinut akiitsut
Akileraarutikka-mi pisortanut akiligassavit takussutissartaa aasinnaavat.
Ilitsersuut uani takujuk
Akiliisitsiniartarnermi immikkoortortaqarfimmut saaffiginnillutit aningaasanik atorsimasannik takussutissat maannakkut atuuttut pissarsiarisinnaavatit.
Aapparisamut meeqqanullu akilersuutit
Avinnermut atatillugu aapparisamit akilersuutissaq aalajangiunneqarsimappat imaluunniit meeqqanut pilersuisussaatitaanermik annertusisat toqqammavigalugit akiliisussaatitaasoq namminerisaminik akiliinngippat, Akiliisitsiniartarnermi immikkoortortaqarfik ikiortigalugu pissarsiassatit tiguniarsinnaavatit.
Akiliisussaatitaasoq ulloq akiliiffissaq kingulleq nallertinnagu akiliisimanngippat, aqaguani akilinngitsuugai Akiliisitsiniartarnermi immikkoortortaqarfimmut saaffiginninnikkut akilersinniarsinnaavatit. Akiliisitsiniarnermi Immikkoortortaqarfimmut saaffiginnikkuit akilersuinissamut pisussanngortitaanermut uppernarsaatip nassarnissaa eqqaamassavat.
Malugiuk
Pingaaruteqarpoq akiligassat akilerneqarfissaani ukioq ataaseq qaangiutsinnagu saaffiginnissagavit. Ukioq ataaseq sinnerlugu qaangiussimappat akiliinngitsoortoq akissarsiatigut ilanngaanneqarsinnaajunnaassammat kingornalu akilersinniarneri ajornarsinerussallutik.
Aningaasat pissarsiassatit Akiliisitsiniartarnermi immikkoortortamit aatsaat tunniunneqarsinnaapput akiliisussaatitaasumit pissarsiarineqarsimappata.
Naammagittaalliuuteqarneq
Akiliisitsiniartarnermi immikkoortortaqarfimmit attavigineqaruit pisortanut akiitsoqarnerit pillugu, illillu isumaqaruit taamaattoqanngitsoq, taava akiitsoqarfigisannut, assersuutigalugu kommunimut imaluunniit Namminersorlutik Oqartussanut aningaasanik taarsigassaqartutit isumaqartumut, akiliisitsiniarnermik oqartussaasup tamanna qaqissagaa piumasaqaatigisinnaavat.
Akissarsiassavit ilaannik akiliisitsiniartarfik ilanngaalluni aallartereersimappat, tikilluaqquneqarputit akiliisitsiniartarfiup attaviginissaanut akiligassiissutigineqartorlu pillugu isumaqatigiissummik sanallusi. Akiliisitsinartarfimmiit akiligassanut ilanngaanneqareersimaguit tamannalu isumaqatiginagu, tikilluaqquneqarputit akiliisitsiniartarfiup attaviginissaanut.
Malugiuk
Akiliisitsiniarnerit aalajangersimasut aallartinneqarnerat imaluunniit suliamik suliarinninneq pillugu apeqqutissaqaruit, akerliliissutissaqaruit naammagittaalliuutissaqaruilluunniit, Akiliisitsiniarnermi immikkoortortaqarfimmut sukkulluunniit saaffiginnissinnaavutit. Suliassiissutivit tuaviornerpaamik suliarinissaanut taakku pisussaaffeqarput, soorluttaaq qanoq iliussanerit pillugu ilitsersuinissamut aamma pisussaaffeqartut aamma paasiniarlugu suut periarfissaanersut.