Nalinginnaasumik paasissutissiineq

Akileraarutit sinnerinut akiligassatit piffissaliunneqartumut akilinngikkukkit, Akileraartarnermut Aqutsisoqarfimmut akiitsorisatit amerliartortissavatit. Akileraarutinut akiitsut, akileraarutit saniatigut akiligassatit tassaapput erniat aamma akiitsutit akiitsorineqartut pilersissimasaat.

Akileraarutinut akiitsutit akilersinnaanngikkukkit, akiitsuit isumakkeerneqarnissaat qinnuteqaatigisinnaavat. Akileraarutinut akiitsut isumakkeerfigineqarneranni pisut marluk kinguneqaataassapput:

• Illit akiitsutit piivissapput
• Akiitsutit appartinneqassapputAkileraarutinut akiitsutit tamakkiisumik ilaannakortumilluunniit isumakkeerneqassappata, piumasaqaatit arlallit eqquutseqqaassavatit.

Akileraarutinut akiitsutit isumakkeerneqaraluartulluunniit, pisut ilaanni isumakkeerineq Akileraartarnermut Aqutsisoqarfimmit utertinneqarsinnaavoq.

Piumasaqaatit

Pisortanut aammalu/imaluunniit namminersortunut akiitsutit akiitsuuppata ataatsimoortut assigiinngitsut, isumakkeerneqarnissamut Kalaallit Nunaanni Eqqartuussivimmut qinnuteqarniarlutit saaffiginnissaatit.

Akileraarutit, akitsuusiinikkut akileraarutit, erniat aammalu akiliutit il. il. pillugit akiitsutit kisiisa Akileraartarnermut Aqutsisoqarfimmut isumakkeerneqarnissamut qinnutigisinnaavatit.

Akileraarutinut akiitsut isumakkeerneqarnissaat taamaallaat piumasinnaavat imaattoqarpat:

• Akiitsorisannut pisussaaffitit ukiuni tulliuttuni eqquutsissinnaanagillu pisinnaanngitsutut isikkoqartut uppernarsarsinnaagukku
• Aamma isumakkeerinninnerup kingunerisaanik illit aningaasaqarnikkut atukkavit ataavartumik pitsanngoriaateqarnissaat Akileraartarnermut Aqutsisoqarfimmit nalilerneqarpat

Akileraarutinut akiitsutit nalinginnaasumik isumakkeertissinnaanngilatit imaattoqarpat:

• Aningaasaqarnikkut atukkatit qulaajarneqarsimanngippata. Aningaasaqarnikkut atukkatit qulaajarneqarsimanngillat, assersuutigalugu suliffissaaleqisuuguit imaluunniit ilinniartuuguit
• Pisortanut annertuunik namminerlu pisuussutigisannik akiitsoqaruit
• Naammaginartumik periarfissaqaraluarlutit akiitsutit akilersorsimanngikkukkit
• Isumakkeerneqarnissaq siunertaralugu atukkannik iluarsisaqarsimaguit. Tassa soorlu assersuutigalugu, akileraarutit sinneri akilernagit akiitsutit allat tamaasa akilersimagukkit, tamatumani naatsorsuutigalugu isumakkeerneqarnissat
• Akileraartarnermut Aqutsisoqarfiup isumakkeerneqarnissamik qinnuteqaatinnik suliarinninnerata nalaani pisortanut nutaanik akiitsoqalerputit
• Aningaasaqarnikkut illersorneqarsinnaanngitsumik iliuuseqarsimaguit

Aningaasaqarnikkut akisussaassuseqanngitsumik iliorsimavutit, assersuutigalugu akiitsorisavit ilangaatsiarsui:

• Pilersimammata, naak nalunngikkaluarlugu aningaasaqarnikkut pisussaaffitit allat naammassisinnaanngikkitit
• Pilersimammata, aningaasaqarnikkut atukkannut naleqqutinngitsumik aningaasaqarnikkut aarlerinartumik iliuuseqarsimanerit patsisaalluni
• Aaqqissuussatut alliartortinneqarsimappata

Pissutsit allat isumakkeerinninnissamut pingaaruteqartumik tamakkiisumik ilaannakuusumilluunniit akerliuppata, Akileraartarnermut Aqutsisoqarfiup akiitsuit isumakkeerneqarnissaat itigartissinnaavaa. Akileraarutinut akiitsutit akilerneqarnissaat neriunaateqanngilluinnartumik inissisimagaluarpataluunniit imaassinnaavoq pisut allat tamakkiisumik ilaannakuusumilluunniit isumakkeerinissamut tunngavissaqartitsinngitsut atuuttut.

Qinnuteqarneq

Akileraarutinut akiitsut isumakkeerneqarnissaat qinnutiginiarukku, qinnuteqarnermut immersugassaq immersussavat.

Akileraarutinut akiitsut isumakkeerneqarnissaannut qinnuteqarnissamut immersugassaq

Qinnuteqarnermut immersugassap peqqissaartumik immersornissaa pingaaruteqarpoq. Paasissutissat pingaaruteqartut amigaataappata, matumani qinnuteqarnermi ilanngussassat pisariaqartut ilanngullugit, qinnuteqaatit Akileraartarnermut Aqutsisoqarfiup itigartissinnaavaa.

Qinnuteqarnermut immersugassaq immersoreerukku, ilanngussat ilanngullugit Akileraartarnermut Aqutsisoqarfiup Innuttaasunut sullissivianut tunniutissavat nassiulluguluunniit.

Malugiuk
Akileraarutinut akiitsuit isumakkeerneqarnissaanut qinnuteqaruit, illit katissimasavillu imaluunniit inooqativit isertitai ilanngullugit uppernarsassavatit. Taamaattumik qinnuteqaatitut immersukkamut qaammatini kingullerni pingasuni aningaasarsiarisimasasi allagartai ilanngutissavatit, assersuutigalugu akissarsiat allagartaasa assilineri imaluunniit utoqqalinersiat allagartaasa assilineri.

Illit katissimasallu imaluunniit inooqatillu marluullusi akileraarutinut akiitsusi isumakkeerneqarnissaannut qinnuteqassagussi, immikkut qinnuteqarnermi immersuiffissat immersussavasi.

Qinnuteqarnissamut immersuiffissaq pillugu ilitsersuut

Isertitat aningaasartuutillu
Isertitatit tamaasa paasissutissiissutigissavatit – aamma pisortanit utoqqalinersiat aammalu pisortanit pisartakkat allat. Aammattaaq aningaasartuutitit tamaasa paasissutissiissutigissavatit.

Qaammatikkaartumik isertitatit aningaasartuutitillu takussutissanngortissavatit. Qaammatit pingasukkaarlugit, ukioq affakkaarlugit ukiulluunniit ilivitsukkaarlugit isertitaqartaruit aningaasartuuteqartaruilluunniit, qaammatikkaartunngorlugit agguataassavatit. Ukiup ingerlanerani isertitat aningaasartuutilluunniit nikerartuuppata, isertitat aningaasartuutilluunniit agguaqatigiisillugit qaammatikkaartumik naatsorsussavatit.

Pigisat
Pigisat tassaapput illit aamma katissimasallu imaluunniit inooqatigisallu pigisasi. Ataatsimoorlusi pigisassi nalingat avissavat. Illit pigisatit allattuivinni ilinnut tunngasuni allassavatit aamma illit katissimasavit imaluunniit inooqatigisavit pigisai allattuivinni tassunga tunngasumi allanneqassallutik. Pigisat nalingat tassaavoq taakku tunineqassasuuppata illit naligititassat.

Akiitsut
Akiitsut tassaapput illit aamma katissimasallu imaluunniit inooqatigisallu akiitsorisasi. Akiitsut tamakkerlugit immersugassami uani ilanngunneqassapput – aamma akiitsut sinneri assersuutigalugu illumut aalajangersimasumit, biilinit imaluunniit umiatsiamit siusinnerusukkut pigisimasanneersut. Naafferartumik akilersuinissamut isumaqatigiissutit aamma allassinnaavatit kiisalu kontumut akiitsut aamma aningaaserivinni akuerisaasumik atorneqarsinnaasut.

Illit katissimasallu imaluunniit inooqatigisallu akiitsunut akiliisussaasutut uppernarsaagussi, akiitsorisap tamakkiisup annertussusia, tamassi immikkut allassavarsi.

Allannguutit

Akileraarutinut akiitsutit isumakkeerneqaraluartut, Akileraartarnermut Aqutsisoqarfimmit pisut ilaanni isumakkeerneqarneq utertinneqarsinnaasarpoq. Imaasinnaavoq assersuutigalugu:

• Isumakkeerneqarnissamut suliamut atatillugu Akileraartarnermut Aqutsisoqarfimmut paasissutissat kukkusut tunniussimagitit
• Akiitsut ilaat isumakkeerneqanngitsup naafferartumik akilersorneranut atatillugu pisussaaffinnik sumiginnaasimaguit