Nalinginnaasumik paasissutissiineq
Nunani naalagaaffinnilu sumiluunniit nioqqutissat akitsuuteqartinneqarnissaannut pisinnaatitaaffeqartoqarpoq. Akitsuutit taama ittut toqqaannartuunngitsumik akileraarutinik taasarpaat. Danmarkimi akitsuut Momsimik taasarpaat, kaaviiaartitallu akitsuutitigut amerlanerunissaannik siunertaqarluni.
Nunat imaluunniit naalagaaffiit ataasiakkaat akitsuutip annertussusissaanik aalajangiisarput. Danmarkimi nioqqutissap akiata 25 %-ia momsiuvoq.
Akitsuut nioqqutissap akianut ilanngunneqartarpoq. Nioqqutissat pineqartut tassaapput:
- Nioqqutissat tigussaasut, soorlu atisat aamma atuinermi atugassat
- Kiffartuussinerit, soorlu kigusiarnerit, atuartitsinerit suliaritinnerillu
Kalaallit Nunaanni nunat amerlanngitsut assigalugit momsimik akitsuusiisoqarneq ajorpoq. Tamanna ima paasineqassaaq, inuit Kalaallit Nunaanni najugaqartut Kalaallillu Nunaata avataani nioqqutissanik niuerniartut momseqanngitsunik pisiniarnissamut periarfissaqarput, tassa Kalaallit Nunaannukarunik imaluunniit nioqqutissanik Kalaallit Nunaannut nassiussititsigunik. Momsillu utertinneratigut momsimut akiliineq ajorput.
Momsimik akiliisimanermi utertitsinissamut piumasaqaatit
Momseqanngitsunik niuerniaruit, pissutsinik arlalinnik eqqumaffigisassaqarputit:
- Pisiniarfigisassavit momsimik utertitsisinnaanerat qulakkiissavat
- Niuerniarninni najugaqarnermut uppernarsaat imaluunniit pas atussavat
- Nioqqutit pisiatit pisinermut uppernarsaateqartissavatit imaluunniit Tax-Free Cheque
- Pisinermut uppernarsaatikkut imaluunniit Tax-Free Cheque-kkut ativit, najukkavit aningaaserivimmilu kontuit allannissai isumagissavatit
Nioqqutissat momsillit momsii utertinneqarsinnaanngitsut
Nioqqutissat Kalaallit Nunaata avataani atuinermut tunngasut, momsitai utertinneqarsinnaanngillat. Assersuutigalugu makkuupput:
- Akunnittarfinni unnuinerit
- Sommerhus-inik biilinilluunniit attartornerit
- Nuannaarniartarfinnut billetsit
Ima iliussaatit
Momsimik utertitsineq pisisup pisititsisullu akornanni isumagineqartussaanera eqqumaffigissavat. Kalaallit nakkutilliisutut oqartussat suliassariinnarpaat, nioqqutissap Kalaallit Nunaannut eqqunneqarsimanera nakkutigissallugu.
Pisinermut uppernarsaat imaluunniit Tax-Free Cheques, illoqarfigisanni nakkutilliinermut oqartussani naqissusertissinnaavat. Pisinermut uppernarsaatit imaluunniit Tax-Free Cheque naqissusertereerpat, nioqqutissanik pisiniarfinnut nassiutissavat, imaluunniit Tax-Free Cheque-kkip tunuani allassimasumi najukkamut nassiutissavat. Eqqaamallugu assinganik pissagavit.
Aammattaaq Tax-Free Cheque-kkivit Kastrup-ip mittarfissuani naqissusertinnissaanut momsiatalu utertinnissaanut periarfissaqarputit.
Malugiuk
Nioqqutissat pisiatit momsitaasa utertinniarnerini nakkutilliinermut oqartussanit takuneqarnissaanut pisinnaatitaaffeqarput.
Pisinermut uppernarsaatitit imaluuniit Tax-Free Chequet pisut ilaanni nakkutilliinermut oqartussanit naqissusertariaqanngilaat. Assersuutigalugu nioqqutissat takutissinnaanngikkukkit imaluunniit piffissarititaasoq qaangiussimappat.
Killiliussat
Pisinermut uppernarsaatit aamma Tax-Free Chequet naqissusertinnissaannut killiliussaavoq, nioqqutissat pisiarineranit kingusinnerpaamik qaammatit pingasut qaangiuppata.